Батыс Қазақстан облысында автокөлік пен поездың соқтығысуы салдарынан екі адам қаза тапты

Министрліктің ақпаратына сәйкес, апат 26-мамырда 14 сағат 29 минутта Бөкейорда ауданындағы Шұнғай елді мекенінің маңында болған. Орал шекара отрядының «Шұнғай» заставасына қарасты «УАЗ» автокөлігі Махачкала -Мәскеу бағытындағы №85 жолаушылар поезының локомотивімен соғысып қалған.

Апат салдарынан автокөліктің жүргізушісі мен оның жолаушысы жарақат салдарынан оқиға орнында мерт болды. Апатқа байланысты аталмыш жол учаскесіндегі қозғалыс екі сағатқа тоқтатылды.
Сонымен бірге 26-мамырда Ағадыр-Қарағанды-Сортировочная бағытындағы жүк поезының бос вагонының жолдан шығып кетуі салдарынан үш сағатқа қозғалыс тоқтатылды. Бұл оқиға Қарағанды облысындағы Қарамұрын станциясында болған.