Алматыдағы бизнес-конференция аясында Қазақстан президенті маңызды мәлімдеме жасамақ - Р.Холбрук

Бүгін, 14-маусымда "Қазақстан инвестициялардың жаңаша ағынын тартады: диверсификацияға және тұрақты өсімге бағытталған стратегия" тақырыбы бойынша халықаралық бизнес-конференция қарсаңында Қазақстан президенті Нұрсұлтан Назарбаев маңызды мәлімдеме жасамақ. Бұл туралы Азия қоғамының төрағасы Ричард Холбрук Н.Назарбаевпен кездесуден кейін журналистерге мәлімдеді,- деп хабарлайды KZ-today тілшісі.

Р.Холбрук бірақ Елбасының дәл қандай мәлімдеме жасайтынын нақтылаған жоқ. Азия қоғамы төрағасының мәлімдеуінше, «конференцияның мақсаты — халықаралық іскерлік қоғамдастыққа өз экономикасын дамыту үшін Қазақстан тарапынан таяу болашақта қандай қадамдар жасалғалы жатқанын паш ету болып табылады».

«Қазақстан — аймақтағы ең жоғары дамыған көшбасшы ел болғандықтан, оның экономикалық, саяси және әлеуметтік перспективалары жалпы осы өңір үшін және дүниежүзі үшін айрықша маңызға ие»,- деді ол.
«Ертең конференция өз жұмысын үлкен қарқынмен жалғастырады. Ол аса қызғылықты және жемісті бас қосу болады»,- деді Р.Холбрук. Форумға түрлі елдерден келген 600-ден астам өкілдер қатысуда.