ҚР СІМ Орталық Азиядағы адам дамуы жөніндегі бірінші баяндаманың тұсаукесеріне әзірленуде

ҚР СІМ БҰҰ-ның еліміздегі кеңсесімен бірлесіп Орталық Азиядағы адам дамуы жөніндегі "Адам дамуы мен адамның қауіпсіздігін қамтамасыз ету саласындағы аймақтық ынтымақтастық" атты бірінші баяндаманың тұсаукесеріне әзірленуде. Бұл туралы бүгін, 28-қарашада журналистерге арнап өткізілген қысқаша баспасөз мәслихатында ҚР СІМ-нің ресми өкілі Ержан Ашықбаев құлағдар етті,- деп хабарлайды KZ-today тілшісі.

Е.Ашықбаевтың айтуынша, баяндама негізінен «сауда мен инвестицияны дамыту, заңсыз көші-қон, есірткі мен лаңкестіктің белең алу проблемаларын шешу, табиғи апаттардың залал-зардабын жұмсарту мен олардың алдын алу саласындағы аймақтық ынтымақтастық» тақырыбына арналады.

Сонымен бірге ҚР СІМ-нің арнаулы өкілінің айтуынша, «осындай тұсаукесерлер аймақ мемлекеттерінің астаналары мен Токио, Брюссель, Женева және Мәскеу қалаларында жасалады».