«Ұшақ ғарыш айлағына бүгін ұшып келеді деп күтілген -тұғын. Бірақ бұл мерзім, алдын-ала ақпарат бойынша, ертеңге шегерілді»,- деп хабарлайды баспасөз қызметіндегілер.
Ғарыш аппараты тиелген контейнерлер Мәскеу түбінен ұшақпен жеткізілуге тиіс. Онда жер серігі сынақ-зерттеулерден өткізілді. Ғарыш айлағына жеткізілген соң жер серігі монтаж-сынақ кешенінің 92А50 алаңында орнатылады. Жер серігін жасап шығарған ресейлік зауыттың мамандары аппаратты ол жерде ұшырылым алдындағы дайындықтан өткізеді.
Ал жұма күні «Протон-К» зымыран тасығыштың блоктары тиелген вагондар ғарыш айлағына келеді деп күтілуде. Блоктар 92-1 санды алаңның монтаж-сынақ корпусына жеткізіліп, құрастырылып, зымыранның жүйелері тексеріледі. Ал «Протон-К» зымыран тасығышының бірінші сатысының блоктары 19-сәуірде ғарыш айлағына жеткізілді.
«KazSat» жер серігін ұшыру мерзімі 8-маусымға межеленген.
