Баспасөз қызметінің ақпаратына сәйкес, бүгін үкімет үйінде Қазақстан Республикасы мен Қытай Халық Республикасы үкіметтік делегацияларының келіссөздері өтті.
ҚР премьер- министрі Кәрім Мәсімов пен ҚХР төрағасы Ху Цзиньтао бастаған келіссөзге қатысушылар сауда- экономикалық және энергетикалық мәселелерге қатысты, сондай-ақ, Қазақстан мен ҚХР арасындағы шекаралық ынтымақтастықты дамыту жайын талқылады.
Тараптар «шекаралық ынтымақтастықты дамытумен қатар, экономиканың шикізатсыз секторындағы өзара байланыстарды күшейту қажеттігін» атап өтті.
Қытайлық делегация машина жасау , телекоммуникация, химия және инфрақұрылым құрылысы сияқты салаларда бірлескен жобаларды жүзеге асыруға қызығушылық білдірді.
Сонымен қатар, металлургия, мұнай-химия, көлік және логистика, энергетика, тоқыма өнеркәсібі, ғарыш индустриясы және туризм салалары бойынша да өзара қарым- қатынастарды дамытудың болашағы зор екені атап өтілді.
Кездесуді қорытындылаған Қазақстан премьер-министрі ҚХР төрағасының Астанаға сапары «Қазақстан мен Қытай арасындағы стратегиялық серіктестікті нығайту жолында тағы бір маңызды қадам болатынына» сенім білдірді.
Бүгін сондай-ақ, үкімет үйінде ҚР премьер-министрі Кәрім Мәсімов ҚХР Мемлекеттік Кеңесі премьерінің орынбасары У И ханымды қабылдады.
Кездесу барысында Қазақстан мен Қытай арасындағы саяси, экономикалық және мәдени гуманитарлық ынтымақтастықты әрі қарай дамыту мәселелері талқыланды.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті