«Елімізде заң бұзушылықтар үшін жүктелген айыппұлдарды төлеуден бас тартатын санасыз жүргізуші көп, осыған байланысты біз аталған айлық жұмысты өткізуге мәжбүр болдық», — деді И. Елекеев.
«Республика бойынша айлық барысында өтелген берешектің жалпы көлемі 579 млн 331, 6 мың теңге, соның ішінде әкімшілік айыппұлдар бойынша өтелген берешек 76 млн 618,5 мың теңгеге тең», — деді төраға.
Науқан басталған сәтте сот үкімін орындаушының қаулысы бойынша іздеуде болған автокөліктер саны 6328 болса, науқан кезінде 2708 осындай автокөлік құралы табылып, айыппұл тұрағына өткізілді.
«Айлық уақытында еліміз бойынша сот өндірісі аяқталған істер саны 3180 болса, оның 2379-ы әкімшілік айыппұлдар бойынша», -делінген хабарламада.
Өз кезегінде ҚР ІІМ жол полициясы комитетінің төрағасының орынбасары Болат Өскенбаевтың хабарлағанындай, айлық жұмысы барысында «бұған дейін төленбей келген айыппұлдардың шамамен тең жартысы өтеп алынды».
«Біз қазір осындай науқанды әріқарай да өткізе беру мүмкіндігін талқылап жатырмыз, мұндай шараны жылына үш-төрт рет өткізіп тұратын шығармыз. Егер қазір осы жұмыс бөлігінде тәртіп орнатылса, адамдар бұдан былай өз еркімен саналы түрде айыппұлдарды төлейтін болады»,- деді Б.Өскенбаев.
Оның мәліметінше, осы айлық барысында ең көп көлік құралдары ұсталған өңірлерге мыналар жатады: Оңтүстік Қазақстан облысы (557 көлік), Ақтөбе облысы (288), Маңғыстау облысы (229), сондай-ақ, Астана (254) және Алматы (172) қалалары. «Заң бұзушылықтар ең аз анықталған өңірлер Павлодар (56), Шығыс Қазақстан (66), Солтүстік Қазақстан (76) және Алматы облыстары (75) болмақ», — деді Б. Өскенбаев.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті