Жиында сөз алған ҚР Мәдениет министрлігі Мәдениет комитетінің төрағасы Ілияс Қозыбаев, Беларусияның өнер саңлақтарына сәттілік тілей отырып, екі елдің рухани байланысының нығая беруіне ортақтастық білдірді. «Біздің халықтар арасында достық, бауырластық байланысының негізі, тамыры өте тереңде жатқандығына ешкім де күмән келтірмес. Мемлекеттер арасында рухани, мәдени шекара жоқ. Сондықтан мәдени байланысымыздың жандануына қуаныштымыз. Былтыр Қазақстанның Беларус мемлекетінде өткен мәдениет күндері, осы байланысымыздың салаланып, әр жыл сайын күшейетіндігіне сенім білдіреміз», деп атап көрсетті І. Қозыбаев.
Театр сахнасында «Классик-авангард» жеке орындаушылар ансамблінің концерті өтті. Ұжымда 18 кәсіпқой музыканты бар «Классик-авангард» жеке орындаушылар ансамблі 1988 жылы құрылған. Ансамбльге Владимир Байдов дирижерлік етеді.
«Былтыр Беларус Республикасының Минск қаласында Қазақстан Президенті Нұрсұлтан Назарбаевтің қатысуымен Қазақстанның Беларусиядағы Мәдениет күндері өткен болатын. Екі ел арасындағы өзара қарым-қатынастар даму үшін бүгіндері Беларус халқы өздерінің мәдениетінің түрлі салаларына арналған құндылықтарды ала келген. Мысалы, қазіргі заманғы беларус кескіндемесінің көрмесін және беларус киносының күндерін өткізу жоспарлануда», дейді Мәдениет министрлігіне қарасты «Рухани даму» қорының президенті Алмас Оразхан.
Бүгін, сейсенбіде ҚР Президентінің мәдениет орталығында өтетін қазіргі заманғы беларус кескіндемесінің көрмесі ашылады. Көрме бірқатар суретші буынының жұмысымен танысуға мүмкіндік береді. Экспозицияға қатысушы жиырма төрт автор офорт, акватинта, мецца-тинта, құрғақ ине техникасымен орындалған, сонымен қатар линогравюра, литография, акварельмен салынған туындыларын паш етпек.
Ал Беларус киносының күндері аясында Қазақстанда көркем, деректі, анимациялық фильмдер, сонымен қатар, Беларус бейнеорталығының бірқатар фильмдері көрсетіледі.