Астанада «Шабыт» фестивалінің лауреаттары анықталды

Бүгін, дүйсенбіде Астанада өтіп жатқан «Шабыт» шығармашыл жастар фестивалінің лауреаттары мен дипломанттарының аттары аталды. «Үздік әдеби шығарма», «үздік журналистік жұмыс», «бейнелеу өнері», «эстрада жанры», «халық әндері» және «классикалық әндер» аталымдары бойынша өнерлерін сынаған шығармашыл жастарға «Шабыттың» I-ші, II-ші және III-ші жүлдесі, атаулы және арнайы сыйлықтар және дипломдар табысталды.

Бір жұма бойы бас шаһарды ән мен күйге тербеген фестивальдің Гран-при жүлдегерлері мен Қазақстан Республикасы Президентінің Кубогінің иегерінің есімдері бүгін кешке елорададағы Бейбітшілік және келісім сарайында, «Шабыт» фестивалінің жабылу салтанатында анықталады.

Өнер өрендерінің байқауына Ресей, Қазақстан, Өзбекстан, Якутия, Қазан, Беларус және басқа да шет мемлекеттерінен 604 үміткер қатысқан болатын. Олардың арасынан ең дарындыларды анықтауда Италия, Испания, Польша, Франция, Қырғызстан, Өзбекстан және Қазақстан елдерінің өкілдерінен құралған қазылар алқасы қызмет етті.
Фестиваль өзінің ғұмырында 13 мыңға тарта шығармашыл жастың жігерін жанып, жарқын таланттарын танытуларына мүмкіндік беріп, Астанада мәдениет пен өнер зиялыларының шоғырын қалыптастырған халықаралық «Шабыт» фестивалі елордада биыл он үшінші рет өтуде.
«Шабыт» — 1998 жылы Астананың туған жылында дүниеге келді. Содан бері бұл фестиваль Елбасы Нұрұсұлтан Назарбаевтың жеке қолдауымен өтіп келеді.