С.Мұқанов атындағы қазақ сазды-драма театрының гастрольдік сапары «Қос жебе» драмасымен басталды - Ақмола облысы

Кеше Сәбит Мұқанов атындағы Солтүстік Қазақстан облыстық қазақ сазды-драма театры өңірдегі бір апталық гастрольдік сапарын Шахмет Хұсайынов атындағы қазақ-музыка драма театрында Александр Володиннің «Қос жебе» драмасымен бастады.

Қойылымды ҚР еңбек сіңірген қайраткері Әлімбек Оразбеков сахналаған болатын. Басты рольдерді Біржан Жалғасбеков, Нартай Сәрсебаев, Батырбек Шаманбетов сынды есімі көпшілікке танымал актерлер сомдап, жұртшылық қошеметіне бөленді. Алдағы уақытта театр труппасы көрермендер назарына Әлімбек Оразбековтың «Бір түп алма ағашы» драмасын, Михаил Задорновтың «Күйеуіңізді сатыңызшы» комедиясын, Мағжан Жұмабаевтың «Батыр Баян» тарихи драмасын, Оспанхан Әубәкіровтың «Қожа мен спорт» ертегісін ұсынатын болады. Сонымен бірге жұртшылықпен пікір алмасу, туындаған сауалдарға жауап беру қарастырылған. Театрдың он жылдығына орайластырылып отырған гастрольдік сапар аясында «Шамшырақ» шоу-концерттік бағдарламасы да ескеріліп отыр.

Өнер ұжымы мерекелік турнелерін бұған дейін Қарағанды мен Қостанай облыстарында өткізген болатын.