Астанада Ш. Қалдаяқовтың 80 жылдық мерейтойына арналған «Менің Қазақстаным!» атты Халықаралық ән фестивалі өтеді

ҚР Мәдениет министрлігі және «Қазақ әуендері» АҚ ұйымдастыратын фестивальға облыстық ән байқауларының жеңімпаздары, сондай-ақ Қытай, Моңғолия, Ресей, Тәжікстан және Өзбекстанда тұратын қазақ диаспораларының өкілдері қатысады. Фестивальдің мақсаты — қазақтың ән өнерін дамыту, дарынды жастардың шығармашылығына қолдау көрсету, Шәмші Қалдаяқовтың және қазақ композиторларының шығармаларын ұлықтап, бұқара халыққа насихаттау.

Фестивальдің салтанатты ашылу рәсімі 11 қараша күні сағат 11.00-де Президенттік мәдениет орталығында болады. Қазақстандық орындаушылардың екі күндік іріктеу кезеңі де аталған ғимаратта ұйымдастырылады. Ал 13 қарашада сағат 19.00-де «Қазақстан» Орталық концерт залында фестивальдің жеңімпаздары мен лауреаттарын марапаттау рәсімі және гала-концерт өтіп, оған қазақ эстрадасы жұлдыздары, атап айтқанда Б.Төлегенова, Н.Нүсіпжан, А.Қоразбаев, Қ.Әбілдина, Н.Үсенбаева, Р.Стамғазиев, Б.Сәмединова, Т.Забирова, М.Арынбаев, А.Жорабаева, Р.Нұржігітов, М.Сәдуақасова, «Жігіттер» тобы қатысады.
Қазақстанның белгілі өнер қайраткерлерінен құрылған қазылар алқасын КСРО халық әртісі, КСРО мемлекеттік сыйлығының лауреаты, профессор Бибігүл Төлегенова басқарады.
Шәмші Қалдаяқов — көрнекті композитор, Қазақстанның халық әртісі, халық әндерінің орындаушысы, ақын, қазіргі қазақ эстрадасының негізін қалаушы, 1930 ж. 15 тамызда Шымкент (қазіргі Оңтүстік Қазақстан) облысы, Қызылқұм ауданында туып өсті. 1956-1962 ж.ж. Алматыда Құрманғазы атындағы Мемлекеттік консерваторияда оқыды.
Шәмшінің әндері таң қалдырарлық әуенділікпен, өзіндік дыбыс пен лирикасымен ерекшеленеді. Олар ән мәдениетінің ажырамас бөлігіне айналды. Шәмші шын мәнінде өткен уақыттың, қазіргі кезгі және келешектің композиторы болып есептеледі. Ол осы кезеңдердегі интонациялардың барлығын өз музыкасында біріктіре білген. Композитордың шығармашылық мұрасы үш жүзден астам әндерден тұрады.