Ш.Қалдаяқов қазақ эстрадасы өнерін, осы заманғы қазақ музыкасын жаңа биікке көтерген адам - М.Құл-Мұхаммед

Фестивальді салтанатты түрде ҚР Мәдениет министрі Мұхтар Құл-Мұхаммед ашты. Министрдің айтуынша, ХХ ғасырды қазақ әдебиеті мен мәдениетінің алтын ғасыры деп айтуға болады. Елді бостандық үшін күреске шақырып, тәуелсіздік жөніндегі идеялардың ұрығын сепкен алаштықтар 37-ші жылдың қанды қуғын-сүргініне ұшырағаннан кейін, қазақтың бұл екі қазынасының шамы сөне бастаған секілді болғанымен 50-ші жылдары ол қайта көтеріліп, 60-шы жылдары тамаша есімдерді таныта отырып қайта түледі.

«Сондай талантты тұлғалардың бірі Ш.Қалдаяқов еді. Шәмші жалғыз келген жоқ, онымен бірге сол кездегі қазақ мәдениеті мен әдебиетінің үлкен ренессансты тұлғалары келді. Шәмші ағамыз қазақ эстрадасы өнерін, осы заманғы қазақ музыкасын жаңа биікке көтерген адам болды. Қалдаяқовтың музыкасын М.Әуезов та тыңдап өткен», деді ол.
Министр атап көрсеткендей, өкінішке қарай, «Ән ағамыздың» таланты кеңес заманында өз дәрежесінде бағаланған жоқ. Бірақ ел тәуелсіздігін алған алғашқы жылы Елбасы Н.Назарбаевтың Жарлығымен Ш.Қалдаяқовқа «Қазақстанның халық әртісі» атағы берілді. Ал таяуда, 2010 жылдың қазанында мемлекеттік ән ұранымыздың қос авторы Ж.Нәжімеденов пен Ш.Қалдаяқов Мемлекеттік сыйлықтың иегерлері атанды.
Фестивальға Қазақстанмен бірге Қытай, Ресей, Тәжікстан, Өзбекстан мен Моңғолиядан барлығы 20 әнші қатысуда. Олар екі күн бойы Шәмшінің әндерін шырқап, өнерлерін ортаға салатын болады. Олардың өнерін күміс көмей әншіміз Бибігүл Төлегенова бастаған қазақ эстрадасының майталмандары бағалайтын болады.
Ән мерекесінің үшінші күнінде Б.Төлегенова, Н.Үсенбаева, Н.Нүсіпжанов, А.Қоразбаев, Б.Сәмединова, Қ.Әбілдина, Р.Стамғазиев, М.Арынбаев, М.Сәдуақасова және тағы да басқа қазақ өнері шеберлерінің гала-концерті өтіп, жеңімпаздардың есімдері жарияланады.