"Ресми статистика мәліметтеріне сәйкес, маусымның соңында әлеуметтік маңызы бар азық-түлік тауарларының бағасы жыл басына қарағанда 7 пайызға ұлғайды. Ағымдағы жыл басынан бері пияз — 81,1 пайызға, картоп — 74,9 пайызға, қырыққабат — 61,2 пайызға, сәбіз — 38,1 пайызға, сиыр еті — 10,7 пайызға өскені байқалады", — деді ҚР Ұлттық экономика министрі Тимур Сүлейменов Үкіметтің бүгінгі отырысында. Министрдің сөзіне қарағанда, онымен бір мезгілде бірқатар азық-түлік өнімдерінің бағасы арзандап отыр. Мәселен, тауық жұмыртқасының бағасы — 26,9 пайызға, қарақұмық — 19,7 пайызға, күнбағыс майы — 7,6 пайызға, қант 1,3 пайыға төмендеді. Азық-түлік бағасының қымбаттауына бірнеше себеп бар. "Әр жылдың екінші тоқсанында тұрақтандыру қорлары азая бастайды. Ал жаңа өнімнің бағасы қымбат болады. Бұдан бөлек, биыл пияз, картоп, қырыққабат сияқты азық-түлік өнімдерін Өзбекстанға экспорттау көлемі ұлғайып отыр", — деп атап көрсетті Тимур Сүлейменов.
