Жарияланды: 540

2025-жыл дегенде мұнай құны әрбір баррельге шаққанда 48 долларға дейін өсуі мүмкін

Ресейлік және ОПЕК сарапшыларының бағалауынша, таяудағы 20-30 жылда мұнай негізгі қуат көзі ретінде қала береді, әрі оның құны 2025-жылы әрбір баррельге шаққанда 48 долларға дейін өсуі мүмкін. Бұл туралы KZ-today тілшісіне Ресейдің "Новости" ақпараттық агенттігінің хабарламасынан мәлім болды.

Бүгін, 4-шілдеде Мәскеуде өткізілген баспасөз мәслихатында Мәскеу мемлекеттік халықаралық қатынастар институтының Жылу энергетикалық кешен жөніндегі Халықаралық институтының директоры Валерий Салыгиннің айтуынша, аталмыш болжам жуырда өткізілген Ресей-ОПЕК аралық семинарда ортаға салынған. В.Салыгиннің хабарлауынша, мұнай базарындағы тұрақты даму одан әрі жалғасқан жағдайда дүниежүзіндегі мұнай тұтыну көлемі 2025-жылға дейін жыл сайын 1,8 процентке өсіп отырмақ. Соған сәйкес, жалпы мұнай тұтыну көлемі 2001-жылғы 77 млн. баррельден 2025-жылы 115 млн. баррельге дейін өседі. Ал мұнай базарында тұрақсыздық белең алған жағдайда 2006-жылы мұнай бағасы әрбір баррельге шаққанда 20 долларға дейін арзандауы мүмкін. Ахуал осындай қолайсыз бағытта өрбісе, ОПЕК сарапшыларының бағалауынша, Ресей бюджетінің шығыны 2020-жылға дейін 32-35 млрд. долларға жетеді,- деді В.Салыгин. Мәскеу Халықаралық институты директорының айтуынша, дүниежүзілік мұнай рыногында тұрақтылықты қамтамасыз ету тұрғысында Ресей мен ОПЕК мүддесі өзара сәйкес. В.Салыгиннің айтуынша, тұрақтылықты сақтаудың басты құралы- мұнай экспортына квота белгілеу боп қала бермек. Әзірге ОПЕК квота беру мәселесін өз бетімен шешіп отыр, алайда мұнай экспорттаушы елдердің ұйымы бұл мәселені Ресеймен бірлесе отырып шешуге мүдделі деді В.Салыгин.

Пікір қалдырыңыз

Пікір қалдыру тіркелген пайдаланушылар ғана мүмкін

Закрыть