Алматы облысында орын алған екі жол апатынан 7 адам қайтыс болып, 4 адам жарақаттанды

Бұл туралы Алматы облыстық ІІБ баспасөз қызметінен KZ-today тілшісіне хабарлады. Бірінші жол апаты Сары Өзек- Қорғас трассасының 52-ші шақырымында болған. Жолдың қарсы бағыттағы бөлігіне шығып кеткен ЗИЛ-4503 автокөлігі ВАЗ-2103 маркалы жеңіл машинамен соқтығысып қалған. Соның салдарынан "Жигули" автокөлігінің жүргізушісі мен үш жолаушы, соның ішінде 10-12 жас шамасындағы екі ұл бала мерт болды. ЗИЛ жүргізушісі мен жеңіл көлікте келе жатқан 7 жасар қыз әртүрлі жарақатпен Сары Өзек ауруханасына жеткізілді. Ал екінші жол апаты облыстың Талғар ауданында тіркелді. Талғар - Новоалексеевка бағытында келе жатқан "Мерседес" автокөлігі жолдың кері бағыттағы бөлігіне шығып кету салдарынан "Ауди-80" автокөлігімен соқтығысты. Апат салдарынан Ауди жүргізушісі мен 16-18 жастар шамасындағы екі жолаушы қыз оқиға орнында қаза тапты . Ал Аудиде келе жатқан тағы бір жүргінші мен "Мерседес" жүргізушісі әртүрлі жарақатпен Талғар аудандық ауруханасына жеткізілді.