Бұл туралы КТК арнасы хабарлады.
Биылғы жаз Алматы облысының шаруалары үшін жайлы болғанға ұқсайды. Көксу қант зауытына қызылша облыстың түкпір-түкпірінен келіп жатыр. Көкөніс тиеген көліктердің көптігі соншалық, бірнеше шақырымға созылған кептеліс республикалық маңызы бар «Өскемен-Алматы» тас жолының жұмысына кедергі келтіріп отыр.
Зауыт басшылығы болса, өздерінің де, өзгенің де жұмысына кедергі келтіріп отыр деп шаруаларға өкпелі. Өйткені қызылшаның көбі шіріп кеткен, топырағы да тым көп. Сапалы өнімді іріктеуге уақыт кетеді деген зауыт өкілдері диқандар көкөністің арасына тіпті тас қосып та жіберетінін айтуда.
"Қызылшаның сапасы өте нашар. Шірігі өте көп. Сұрыптап, дұрысын алу керек. Ол жұмысты істеу үшін қосымша адам алып жатырмыз. Еңбектің далаға кетпей, өнімнің көп болғаны жақсы, әрине. Бірақ сапаға да мән беру керек қой.Қызылша емес, ұсақ сәбіз секілді. Күніне осындай 3-4 машинаны кейін қайтарып жатырмыз", — деді Орталық Азия Қант корпорациясының басшысы Галина Баймырзаева,
Бір қызығы, шаруалар мен зауыт басшылығының арасындағы дауды шенеуніктер шеше алмаймыз деп отыр. Себебі, тауар өндірушілердің шаруасына араласуға құқықтары жоқ екен. Бірақ қант қызылшасын тапсыру мәселесін жоспарлау керек дегенмен, оны да енгізе алмай отырған көрінеді.
Алматы облыстық ауыл шаруашалығы басқармасы басшысының орынбасары Каюмчан Омаров "Біз өз тарапымыздан жоспарлау жағын қолға алғанмен, оны ешкім орындамайды. Себебі, шаруа өнімін тазалап, тиеп, өткізіп, кейін қайтуды ойлайды. Кезекке де қанша тұру керек болса, сонша тұрады", дегенді айтып отыр.
Бұл жағдайға Қазақстан шаруалар одағындағылар да алаңдаулы. Олар, зауыт басшылығына қызметкерлерінің жұмыс уақытын қайта қарауды ұсынып, қызылшаны күндіз-түні қабылдату керек дейді.
