Алматы СЭС-ы жабайы сауданың 40 нүстесін жойды

«Өткен аптада жабайы сауданың 43 нүктесі анықталып, оның 40-ы жойылды. Ұсақ сауда желісінің 52 нысаны (дүңгіршектер) жұмыс істеп жатыр. Азық-түлік дүңгіршектерін жоюда көмек көрсету үшін Алмалы, Жетісу, Медеу, Түрксіб аудандарының әкімдіктеріне ақпарат жолданды. 2 айыппұл салынды. Әуезов ауданындағы бір дүйгіршектің қызметін тоқтату туралы материал сотқа жіберілді», - делінген дүйсенбі күні таратылған ақпаратта. Сондай-ақ, 8 базардың маңайы тексерілді. Жабайы сауданың 39 орны анықталып, жойылды, соның ішінде: қозғалатын арбалардан көкөніс пен жемістер, нан-тоқаш өнімдерін сату, сүт өнімдерін, самса, кондитер өнімдерін сату, аппараттан жұмсақ балмұздақ сату, контрафакт өнімдер сату, халық тұтынатын тауарлар, азық-түлік өнімдерін даналап сату. Сондай-ақ, Алматы СЭС-ы сауда орындарына Еуропадан жеткізілген көкөністерді сату бойынша мониторинг жүргізеді. Қазіргі уақытта Алматы сөрелерінде Германия мен Испаниядан әкелінген көкөністер жоқ. Тексерілген көкөністерде энтерогеморрагиялық ішек таяқшасы табылған жоқ.