Бұл Caravan.kz порталы Sputniknews.kz -ке сілтеме жасап хабарлайды.
Ер адамның ерсі әрекеті туралы хабарлама түнгі 12 шамасында түсті.
"Великолукская көшесіндегі үйлердің бірінде тұратын тұрғын қоңырау шалып, пәтерін жалдап тұратын адам пышақпен қорқытқанын хабарлады", – деді полиция департаментінің баспасөз қызметі.
Шақыруға бірінші болып "Гранит-8" патрульдік полиция экипажы келді. Сол уақытта бұзақы жеке үйдің қақпасында тұрып, пышақ көрсеткен.
"Ыңғайлы сәтті күткен полиция аға сержанты Кемелов самбо әдісін пайдаланып, аяғынан шалған. Сондай-ақ, әріптестерінің көмегімен ол тұтқындалды", – деп нақтылады Алматы полициясы.
Тергеу барысында ұсталған азаматтың Қазақстанның көші-қон заңнамасын бұзып, Алматыда тұрып жатқан 48 жастағы Өзбекстан азаматы екені анықталды.
Ендігі жерде ол Қылмыстық кодекстің 293-бабы (бұзақылық) бойынша жауапкершілікке тартылатын болды. Қылмысы дәлелденген жағдайда ол бес жылға дейін бас бостандығынан айырылуы мүмкін.