АҚШ-тағы Қазақстан елшісі Ядролық қауіп-қатерді азайту жөніндегі халықаралық қордың тең төрағасына "Достық" орденін табыс етті

АҚШ-тық саясаткерге орденді табыс ету барысында Қазақстан елшісі : «Елбасы Нұрсұлтан Назарбаевтың атынан және президенттің тікелей тапсырмасымен осынау жоғарғы сыйлықты сізге табыс ету мен үшін үлкен мәртебе. Бұл орденді табыс ету арқылы Қазақстан халқы еліміздің ядролық мұрадан құтылууына және ғаламдық қауіпсіздікті нығайтуға қосқан сіздің теңдессіз үлесіңіз үшін алғыс білдіреді»,- деп атап көрсетті. Өз кезегінде С.Нанн Қазақстан халқы мен Елбасы тарапынан өзінің күш-жігер, үлесі жоғары бағаланғандығы үшін үлкен ілтипатпен ризашылық білдіре отырып қару таратпау ісіне деген өзінің бұлтарыссыз позициясын тағы бір дәлелдеп, Қазақстан мен АҚШ арасындағы аталмыш саладағы ынтымақтастық аясын одан әрі кеңейту бағытындағы белсенді жұмыстарын жалғастыра беруге батыл шешім қабылдағанын тағы бір атап өтті.

Бұдан бұрын да хабарлағанымыздай, Елбасы Нұрсұлтан Назарбаев 2003-жылдың тамыз айында қатерді бірлесіп азайту жөніндегі танымал бағдарламаның авторлары — АҚШ сенаторлары Р.Лугар мен С.Наннды «Достық» орденімен марапаттаған болатын. Аталмыш бағдарлама аясында АҚШ Қазақстанға ядролық және биологиялық қарудың инфрақұрылымын жою мақсатына 200 млн. доллардан астам қаржы бөлген. Қазір Қазақстан мен АҚШ қару таратпау саласындағы өзара белсенді ынтымақтастықты одан әрі жалғастыруда.