Астанада су тарифтері көтеріледі

Ағымдағы айда Астана қаласының тұрғындары үшін су тарифтері 15 пайызға көтеріледі. Бұл туралы бүгінгі баспасөз мәслихатында ҚР Табиғи монополияларды реттеу агенттігінің жауапты хатшысы Рустам Ахметов мәлім етті.

Оның айтуынша, су тарифтерінің көтерілуі осы саладағы кәсіпорындарды жаңарту жұмысымен тығыз байланысты. «Осыған орай, арнайы инвестициялық бағдарлама да бар. Оның көлемі 4 млрд. 97 млн. теңгені құрап отыр. Бұл бағдарлама әлі аяқталған жоқ. Алайда қазірдің өзінде оның оң нәтижелері байқалып жатыр. Мәселен, техникалық шығындар 22 пайыздан 19 пайызға азайса, құрал-жабдықтардың ескіруі 2 пайызға төмендеген», — дейді Р.Ахметов.