Отандық мамандар сауда сөрелерінде самсап тұрған шетелдік өнімдерді жаппай тексеріп шығыпты. Нәтижесі жаға ұстарлық. Мәселен, Украинадан келетін тауық етінінің құрамының 25 пайызы су болып шыққан. Талап бойынша ол 4 пайыздан аспауы тиіс. Ал, Ресейлік тауықтың санынан 80-нен астам иненің ізі анықталыпты. Ең сорақысы, екі елден де тасымалданған құс еттерінде ішек құртын қоздыратын таяқшалар толып жүр. Шетелдік өндірушілер техникалық талаптарды да пысқырмайды екен. Сапасыз тауарлардың қаптамасында не мемлекеттік тілде ақпарат, не өндірілген күні мен жарамдылық мерзімі де көрсетілмеген. Әзірге Украиналық өнімге уақытша тыйым салынып отыр. Ал ресейліктерге қатаң ескерту жасалған. Егер олқылықтар дереу жойылмаса, тыйым түбегейлі болуы мүмкін. Жалпы, Қазақстанға құс етін тасымалдауға 30 жуық шетелдік кәсіпорын құқылы екен.