Соңғы тәулікте тағы 9 баладан сырқат белгілері анықталған. Бәрінің жағдайы жақсы. Мамандар мұны дерттің 14 күндік жасырын кезеңінің аяқталуымен байланыстырып отыр. Одан тыс суық тиіп ауруханаға түскен үш айлық нәрестенің де сынамалары оң нәтиже көрсетті. Балалар арасында таралатын вирус қаншалықты қауіпті?
Бұл туралы Еуразия бірінші арнасы хабарлайды.
Кезекші сыныптардағы оқушылар арасында алғаш рет коронавирус жұқтыру оқиғасы өткен аптада Шығыс Қазақстан облысында тіркелген еді. 4 бала ауырып, аймақтағы екі сынып пен бір мектеп карантинге жабылды. Артынша, Солтүстік Қазақстан облысында да 11 баладан вирус белгілері анықталды. Біреуі балабақшаға барады екен. Енді міне, жайсыз хабар Павлодардан да жетті. 9 оқушы Ковид жұқтырып, өңірдегі екі бірдей мектептің есігіне құлып салынды.
БАТЫРБЕК ӘЛИЕВ ОБЛЫСТЫҢ БАС САНИТАР ДӘРІГЕРІ:
«Осы 9 баланың ішінде төрт бала Шербактинскии районнан , олар симптомсыз, қалада Павлодар қаласында 4 бала симптоммен, легкий степень и бір бала симптомсыз, олардың барлығы лечение амбулторно алып жатыр. Қазіргі таңда домашний карантин уже снят».
Ақтөбе облысында суық тиіп ауруханаға түскен үш айлық нәрестеден алынған ПЦР тест оң нәтиже көрсеткен. Сәби еліміз бойынша қауіпті вирус жұқтырған ең жас пациенттердің бірі.
МҰРАТ МИРМАНОВ ОБЛЫСТЫҚ ТАУАРЛАР МЕН КӨРСЕТІЛЕТІН ҚЫЗМЕТТЕРДІҢ САПАСЫ МЕН ҚАУІПСІЗДІГІН БАҚЫЛАУ ДЕПАРТАМЕНТІНІҢ БӨЛІМ БАСШЫСЫ
«Бүгінгі күні профилактикалық іс -шаралар жүргізілді. Науқаспен қарым қатынаста болғандардан сынамалар алынды, инфекция көзі анықталуда».
Денсаулық сақтау министрлігінің ресми өкілі Бағдат Қожахметовтың айтуынша, қазір еліміз бойынша кезекші сыныптарға барып жүрген 25 баладан вирус белгілері анықталған.
Қазір елімізде 543 мың бала кезекші сыныптарға барып жүр. Ауыл-аймақтардағы мектептерде оқып жүргендер саны — 127 мың . Ал 2,6 миллион оқушы қашықтан оқып жатыр.
кезекші сынып -543 мың бала
дәстүрлі оқу- 127 мың бала
қашықтан оқу -2,6 миллион
Сонда қашықтан білім алатындардың үлесі жалпы оқушылар санының 70 пайызын құрап отыр. Қыркүйектің ортасында Мәжіліс депутаттары олардың білім сапасы төмендеді, жеткіншектерді мектепке қайтарыңдар, деп үкімет басшысына сауал жолдаған еді.
ИРИНА СМИРНОВА ҚР ПАРЛАМЕНТ МӘЖІЛІСІ ДЕПУТАТЫ:
«Біздің еліміз соғысты да, оба, туберкулез сынды ауыр дерттерді де бастан кешірді. Бірақ бірде бір рет мектептер жабылған емес. Тегін, жақсы білім алу әр баланың конституциялық құқы. Ал олардың қашықтан оқып жатқанына бес айдан асты. Осы мезгіл ішінде оқушылардың білім сапасының тым төмендеп кеткендігін ата- аналар айтып отыр. Барлық санитарлық талаптарды сақтай отырып, жеткіншектерді мектепке қайтару керек».
Алайда ертеңіне-ақ төрт бірдей министр, алдарына вице- премьер Ералы Тоғжановты салып, осы мәселе бойынша анайы брифинг өткізген еді. Сондағы айтқандары, елдегі эпидемиологиялық жағдай әлі нашар, балалар қашықтан оқуын бірінші тоқсан бойы жалғастырады. Сөз астарына үңілсек шыдай тұрыңдар, деді.
ЕРАЛЫ ТОҒЖАНОВ ҚР ПРЕМЪЕР-МИНИСТРІНІҢ ОРЫНБАСАРЫ:
«Балалар коронавирусты жеңіл көтерсе де, олар айналасына вирус таратушы болуы мүмкін. Сіздерге әлі де балаларды қашықтан оқыту қажеттігін ескертеміз. Естеріңізге сала кетейін, мамыр айында карантиннен кейін балабақшалардың кезекші топтарын ашқанда, балалар арасында да корнавирус көп тіркеле бастады. Вирустың таралу тізбегін ескерсек, қоғамда тез тарайды. Баладан сыныпқа, сыныптан ұжымға, ұжымнан қоғамға вирус тарала береді».
Наурыздан бері елімізде 137 мыңнан астам адам ковидке шалдықты десек, олардың небәрі — 34-і ғана бала екен. Алайда, мамандардың айтуынша, жеткішектердің өздері ауырмаса да, есесіне вирус тасымалдаушы бола алатын көрінеді.
Жұмабек Бекенов эпидемиолог:
«Балалардың көбісі симптомсыз ауыруға бейім. Жеңіл түрімен ауыруға бейім. Сондықтан біз оларды тасымалдаушы ретінде есептейміз».
Сонымен, кезекші сыныптарға барып жүрген балалардың арасында қауіпті вирус тарала бастады. Егер жағдай осылай қала берсе, оқушылардың екінші тоқсанда мектепке оралуы екіталай, дейді мамандар.
