Тарихи естеліктерге үңіліп, құндылықтар жайында толғаныс жасап, аңызға айналған «Қыз Жібек» фильмінің мәні мен бүгінгі өзектілігін саралауға арналған «Қыз Жібек: 55 жылдан кейін» атты арт-диалог мазмұнды әрі тағылымды кездесу ретінде өтті.
Бұл туынды қазақ мәдениетінің ең танымал жауһарларының бірі. Оның маңызы тек ғашықтық хикаямен шектелмей, әлдеқайда терең мазмұнды қамтиды. «Қыз Жібек» – сұлулықтың, ар-намыс пен адалдықтың биік идеалдарын бейнелейтін мәдени символ, көркем шығарма.
Аталған арт-диалог – Tan Art Residency, Тұңғыш Президент музейі және Күләш Байсейітова атындағы Қазақ ұлттық өнер университеті бірлесіп жүзеге асырған ғылыми-шығармашылық жоба. Кездесудің басты қонақтары мен спикерлері қатарында фильмнің басты кейіпкері Меруерт Өтекешева, өнертанушылар мен университеттің белгілі мамандары – Маржан Жәкенова, Ардақ Юсупова, Жазира Жекібаева, Татьяна Харламова, Жанна Ибрагимова, сондай-ақ FIPRESCI және Қазақстан киносыншылары қауымдастығының мүшелері, кинотанушылар Камила Ғабдрашитова мен Инна Смаилова болды.
Кездесу барысында Меруерт Өтекешеваның жеке архивінен алынған фотокөрме көпшілік назарына ұсынылды.
Іс-шараның маңызды бөлігі – «Қыз Жібек: махаббат пен табыстың формуласы» атты деректі фильмнің тұсаукесері мен талқылауы болды. Бұл аты аңызға айналған туындының түсірілу барысын, шығармашылық топтың қажырлы еңбегін, 60-70-жылдардың рухын бейнелейтін фильм. Картинада түсірілімге қатысушылардың нәтижеге жету жолында жан-тәнімен еңбек етіп, кейде көп нәрседен бас тартқан сәттері әсерлі көрсетіледі.
Қонақтар мен Нұрсұлтан Назарбаев Қоры, Тұңғыш Президент музейінің өкілдері фильмнің көркемдік шешімдері ұсақ-түйегіне дейін мұқият ойластырылғанын атап өтті.
Олардың пікірінше, бұл кинотуынды тарихи жадыны сақтауда ерекше рөл атқарады. Сюжет арқылы қазақ халқының туыстық байланысы, салт-дәстүрі мен әлеуметтік қағидасы көрініс табады. Бұл жай ғана аңыз емес, дәстүрлі өмір салтының өзіндік «тірі энциклопедиясы».
Сондай-ақ, эпостың бүгінгі күнде де өзектілігін жоймағаны айтылды. Ол театр мен опера сахнасындағы түрлі интерпретацияларға арқау болып, жаңа тыныс алды. Осындай бейімдеулер арқылы шығарма өмір сүруін жалғастырып, ұлттық болмысты қалыптастыруға ықпал етуде.
«Қыз Жібек» махаббат жайлы аңыз ғана емес, тарих пен өнерді, халықтық құндылықтарды тоғыстырған қазақ мәдениетінің асыл қазынасы.
