Жарияланды: 1300

Министрлікке жұмысқа кіру үшін ардан аттап өту қажет - Айгүл Иманбаева

Министрлікке жұмысқа кіру үшін ардан аттап өту қажет - Айгүл Иманбаева

Актриса министрлікке жұмысқа кіру үшін ардан аттап өту қажет болатынын айтты.

Айгүл Иманбаева өзіне ұсынылған қызметтер туралы және оларды неліктен қабылдамағанын түсіндірді.

Актриса бір кездері өзіне жасалған ұсыныстардан бас тартқаны үшін өкінген сәттері болғанын жасырмады. Десе де, айтуынша, бұл ұсыныстарды қабылдау үшін ар-ұяттан аттап өтуге тәрбиесі жібермеген екен.

"Қазақта арың мен намысыңның құлы бол деген бата-тілек бар. Қолдан келгенше ардан аттамауға тырысамын. Сол дүниеден аттағанда мен қазір жоқ дегенде мәдениет министрлігінде, болмаса үлкен "креслода" отыратын едім. Оған мүмкіндік те, талай ұсыныс та болды. Моральдық тұрғыдан аттай алмасаң, маңдай тер мен еңбек, адал тапқан табысыңа жүгінесің. Осы нәрсенің нәтижесі тәтті болады екен. Оны енді сезініп жатқан жайымыз бар. Сол кездері "Неге сөйтпедім?! Маған ұсыныс жасап еді, неге бас тарттым? Әттеген-ай" деген кездерім болды", — деді Айгүл Иманбаева Сенбілік таң бағдарламасында.

Әрі қарай актриса бүгінде ары таза болғандықтан, жақындарының көзіне тік қарап абыроймен жүргенін айтып өтті.

"Осы нәрсенің қайыры бар. Ол — балам, анам мен ағайын-туысымның алдында ашық-жарқын, абыроймен жүргенім. Арымнан аттамағандықтан осылай жүрмін деп ойлаймын", — деп қорытты Айгүл Иманбаева.

 

Пікір қалдырыңыз

Пікір қалдыру тіркелген пайдаланушылар ғана мүмкін