Павлодарда Елорда күні тойланып жатыр

Бұл туралы ішкі саясат басқармасынан хабарлады. Мерекелік шара «Құлагер» ипподромында өтетін «Жігіт сұлтаны» конкурсымен ашылады. Ал Қ.Әбусейітов атындағы мәдениет орталығы жас павлодарлықтарды «Армысың, Елорда!» тақырыптық бағдарламасына шақырып отыр. Мерекелік іс-шараны ертең өзен жағалауында өтетін спорттық жарыстар жалғастырады. Онда барлық жастағы әуесқойлардың арасында жүгіру өтеді, футбол мен волейбол турнирлері, армреслингтен, кір тасын көтеруден жарыстар болады. Балалар саябағында «Ертегі-қала» ойын-сауық бағдарламасы, жас суретшілердің «Жайнай бер, Астана!» көрмесі және «Менің елім - Қазақстан» конкурсы өтеді. Ал кешке орталық алаңда Астана туралы әндердің фестивалі, халық серуені және жастардың би кеші болады.