Астана. 28-қыркүйек. «Қазақстан Бүгін» – Алдын-ала мәлімет бойынша, «Протон-М» зымыран тасығышының құлауынан келген шығын 1 млрд теңгеден астам. Бұл жөнінде кеше тілшілерге берген сұхбатында Төтенше жағдайлар министрі Виктор Храпунов хабарлады.
«лдын-ала есептеулер айыппұл санкциялары 1 млрд теңгеден әлдеқайда жоғары және бұл көрсеткіш құлаған зымыран салдарын жоюмен байланысты барлық шығындарды анықтағаннан кейін кейбір кеткен қателіктер түзетіліп, Ресей жағына ұсынылатын болады», — деді В. Храпунов.
Ол үкіметтік комиссияның кезекті отырысында Ресей жағына ұсынылатын «Протон-М» зымыран тасығышының құлауынан келген шығынды есептеу жұмыстары қаралатындығын түсіндіріп өтті.
Осыдан соң, министрдің айтуынша, комиссия істелген жұмыс жайында Қазақстан Республикасының премьер-министріне баяндамақ.
Естеріңізге сала кетейік, қыркүйек айының 13 күні бірлескен қазақстан-ресей штабы 6 қыркүйек күні құлаған «Протон-М» зымыран тасығышының апатты құлауынан келген шығын көлемін анықтауға кіріскен болатын.
Ақпаратты пайдаланған жағдайда «Казахстан Сегодня» ақпараттық агенттігіне сілтеме жасау міндетті