Қазнетте бірнеше адам қаза тапқан жантүршігерлік жол апатының видеосы тарап жатыр, — деп хабарлайды Tengrinews.kz.
ҚР ІІМ өкілдері видеоның Қазақстанға қатысы жоқ екенін айтты.
"WhatsApp-та жол апаты салдарынан адамдардың денелері түсірілген видео таралып жатыр. Ол жағдайдың біздің елге ешқандай қатысы жоқ", — деп хабарлады ІІМ Ішкі және сыртқы коммуникациялар департаментінің директоры Алмас Сәдубаев.
Kaktus.media мәліметінше, 16 желтоқсанда Бішкек-Нарын-Торугарт тасжолында ірі жол апаты болған. Нәтижесінде бес адам қаза болған. Олардың төртеуі Toyota Ipsum көлігінде отырған. Ал Volkswagen Passat көлігі өртеніп, ондағы жүргізуші оқиға орнында қаза тапқан.
Сондай-ақ, басылымның мәліметінше, Toyota Ipsum көлігінде жеті адам болған, ал Volkswagen Passat көлігінде жүргізуші ғана болған.
Алдын ала мәлімет бойынша, Toyota Ipsum жүргізушісі Бішкек — Тоқмақ бағытымен келе жатып, көлік тізгінін басқара алмай, Volkswagen Passat көлігімен соғысқан.