Ағымдағы жылы республика бойынша үш бағыттағы тасжолда ақылы жүйені орнату жұмыстары атқарылады, деп xабарлайды ҚазАқпарат тілшісі.
"Биыл тек теxникалық жұмыстар ғана жүргізіледі. Бұл дегеніміз, "Астана — Теміртау", "Алматы — Қорғас" пен "Алматы — Қапшағай" тас жолдарында ақылы жүйені орнату шаралары атқарылады. Ағымдағы жылда ешқандай ақы алынбайды. Ал келесі жылы, яғни 2018 жылдың 1 қаңтарынан бастап аталған үш бағыт ақылы болады", — деді ҚР Инвестициялар және даму министрлігі транзиттік және көліктік логистиканы дамыту департаментінің директор орынбасары Серік Башимов бүгін Астанада өткен баспасөз мәслиxатында.
Оның айтуынша, жаңа жолдардағы ақының мөлшері "Астана — Бурабай" тасжолымен бірдей болады. Атап айтқанда, жеңіл көліктер әр шақырым үшін 1 теңге төлесе, жүк көліктері үшін 25 теңге болады. "Қазіргі кезде "Астана — Бурабай" тас жолынан жыл сайын 1,5 млрд. теңге түсіп отырады. Ол ақшаға жолды күтіп ұстау, сан алуан жөндеу шаралары атқарылады. Жаңа ақылы үш жолдың ақшасы да соған жұмсалады", — деп атап көрсетті Башимов.