7 қазан мен 14 қараша аралығында әлемге әйгілі «Gardens by the Bay» (Шығанақтағы бақтар) саябағында ұйымдастырылған тақырыптық көрме Мемлекет басшысының директиваларына сәйкес Қазақстан Республикасы Тәуелсіздігінің 30 жылдық мерейтойын мерекелеу аясында өтуде, деп хабарлайды Caravan.kz медиа порталы.
Салтанатты шараға парламент, академиялық және іскерлік орта, дипкорпус өкілдері, Сингапур жұртшылығы және Қазақ диаспорасы қатысты. Іс — шараның құрметті қонағы Сингапурдың Премьер-Министр кеңсесіндегі Министрі, Екінші қаржы министрі және Екінші ұлттық дамудың министрі Индрани Раджа.
Қазақстандықтардың орындауындағы ұлттық музыка концерті ашылу салтанатына қатысқан қонақтардың жоғары бағасына ие болды.
«Gardens by the Bay» саябағында өткізілетін жыл сайынғы көрме — Сингапурдың мәдени күнтізбесіндегі маңызды оқиға. Еліміздің мәдени мұрасы мен табиғи көрікті жерлеріне арналған биылғы көрменің тақырыбы – «Тюльпаномания» кездейсоқ таңдалмады: қызғалдақтардың отаны – қазақ даласы екенін білетіндер аз, ол жерден ежелгі уақытта бұл ерекше гүл Еуропаға әкелініп, кең танымалдыққа ие болды. Саябақтың атқарушы директоры Феликс Лоу пандемия кезіндегі қазіргі карантиндік шектеулерге қарамастан, бағалаулар бойынша көрмеге 100-ден 200 мыңға дейін сингапурлықтар мен шетелдік туристер келетініне сенім білдірді.
Осындай ауқымдағы іс-шара екіжақты ынтымақтастық тарихында алғаш рет Сингапурда өткізіліп отыр. Мерейтойлық оқиғаның құрметіне аралдың орталық ауданында орналасқан 101 га алаңдағы «Gardens by the Bay» саябағында Ұлы Жібек жолының дәстүрлі базарлары қайта жаңғыртылды, Қожа Ахмет Ясауи кесенесінің макеті салынды, дәстүрлі қазақ киіз үйі орнатылды. Халықаралық көрмеде ұсынылған түрлі этнографиялық материалдар, қазақ тұрмысының заттары сол заманның рухын көтеруге көмектеседі.
Ашылу салтанатында сөз сөйлеген Қазақстан Елшісі Аркен Арыстанов көрменің екі ел арасындағы өзара қарым-қатынас жылнамасында өз ізін қалдыратынына және мәдени-гуманитарлық ынтымақтастықты ілгерілетуге ықпал ететініне, сондай-ақ Ұлы Жібек жолының маңызды буыны ретінде Қазақстанның туристік имиджін және қазақстандық басшылықтың директиваларына толық сәйкес келетін, бай мәдени, рухани және табиғи мұрасы бар елді ілгерілетуге маңызды үлес қосатынына сенім білдірді.
Көрмені ұйымдастыруға Сингапурда тұратын қазақстандық диаспора өкілдері елеулі үлес қосты. Ішкі жабдығы бар қазақ киіз үйін осы көрме үшін «Шеберлер ауылы» отандық компаниясының шеберлері арнайы жасап, аралға ұшақпен жеткізді.
