Қазақстандық боксшы Жәнібек Әлімханұлы (8-0, 4 КО) әлемнің ең үздік 5 боксшысының қатарына қосылуға жақындады, – деп хабарлайды Qsport.kz порталы.
WBO Global және WBC Continental Americas чемпиондық белбеулерінің иегері Жәнібек Әлімханұлы әлемдік рейтингінде жоғарылады. Отандасымыз WBO тұжырымының жаңартылған рейтингінде 13-орыннан бірден 6-сатыға көтеріліп, әлемнің ең үздік 5 боксшысының қатарына қосылуға жақындады. 5-орында тағы бір отандасымыз Қанат Ислам тұр. Үздік үштікте америкалық Дэниэл Джейкобс, поляк Камил Шеремета және украиналық Сергей Деревянченко тұр.
Айта кетейік, Жәнібек соңғы жекпе-жегінде 39 жастағы канадалық Альберт Онолуноспен қолғап түйістіріп, алтыншы раундта нокаутпен жеңген болатын.
