Жаңа заң жобасына сай, зейнетақыға үш тарап: мемлекет, жұмыс беруші мен азаматтардың өзі жауапты болады. Яғни, Үкімет адамның еңбек өтіліне байланысты базалық зейнетақыны белгілейді, оған әркімнің ай сайынғы жалақысының 10 пайыздық жарнасын қосыңыз, енді бұл іске жұмыс берушілер де жұмылдырылмақ. Билік зейнетақы қорындағы ақшаны осылайша көбейтпек екен.
Тамар Дүйсенова, ҚР Денсаулық сақтау және әлеуметтік даму министрі:
— Жұмыс берушілер жұмыс істеп жүрген азаматтарға 5 пайыз төлеп отырады ай сайын. Бұл 5 пайыз қазіргі жинақтаушы зейнетақы қорымызға түсіп отырады да зейнеттік жасқа толғанда азаматтарға осы қордан берілетін болады.
Жаңа норма 2018 жылдан бастап енгізілмек. Үкімет бұл әдісті дүниежүзілік үш деңгейлі зейнетақы жүйесінен алыпты. Шетелдерде компаниялар қарамағындағы жұмысшылардың зейнетақы қорына ай сайын табысының 16 пайызын аударады екен. Сондықтан министрдің айтуынша, біздің жұмыс берушілерге артылатын салмақ әлдеқайда жеңіл. Алайда, депутат Перуашев отандық кәсіпкерлерге 5 пайыз да ауыр болады деп отыр.
Азат Перуашев, Мәжіліс депутаты:
-Бірінші кезекте жалақы төмендейді. Кем дегенде, сол қызметкерлердің зейнетақысына қосылатын 5 пайызға азаяды. Ресми жалақыны жасыра бастайды, яғни соған сай салық та азаяды. Бюджетке түсім миллиардтарға кемиді.
Ал мәжілісмендердің енді бірі негізсіз жалақыны төмендеткен жұмыс берушілерді қатаң жазалап, сабасына түсіреміз деп білек сыбанып отыр.
Гүлжан Қарақұсова, Мәжіліс депутаты:
-Естеріңізде болсын, бәріміз бір бюджетке қарап отырмыз. Жұмыс беруші жауапкершілікті өз мойнына толық алуы керек. Міндетті түрде мониторинг жүргіземіз.Әкімшілік кодекске өзгеріс енгіздік, жалақыны төмендеткендер жазаланады.
Жалпы, министрліктің есебінше, егер 5 пайыздық талап енгізілсе, бюджет пайдасы 64 миллиард теңгеге азаяды екен. Яғни бұрын салық ретінде төленген пайыздар енді мемлекет қазынасына емес, қызметкерлердің зейнетақы шоттарына түспек. Осылайша, депутаттар министрмен екі сағат тартысқанымен, соңында заңды бірінші оқылымда мақұлдап берді.