алтыншы кездесуін «Los Angeles Matadors» командасымен өткізіп, америкалық клубты тізе бүктірді. Естеріңізде болса, бұған дейін «Астана Арландары» былтырғы 13 қараша күні аталмыш клубпен Лос-Анджелесте кездесіп 2:3 есебімен ұтылып қалған еді. Есе қайтты! «Астана Арландары» 4-1 есебімен жеңіске жетті.
Боксшылардың алғашқы жұбында Данияр Тоқбаев Калифорния бокс мектебінің түлегі Джоет Гонсалеспен шаршы алаңда кездесіп, жалпы есеп бойынша — 48 : 47; 47 : 48; 49 : 46 ұпайымен WSB аясында шаршы алаңға алғаш рет шыққан америкалықтың аптығын басқан болатын. Ал 61 келіде WSB аясындағы жекпе-жектерде мол тәжірибе жинақтаған жерлесіміз Мерей Ақшалов украин боксшысы Леонид Мальковты айқын басымдылықпен ұтты.
Ал 73 келі салмақ дәрежесінде «Арландар» командасының капитаны қазақ боксының жұлдызы Қанат Сіләммен кездескен грузин Заал Квачатадзе жерлесіміздің күрзі соққысына шыдап тұра алмады. Америкалық клуб атынан алаңға шыққан грузин боксшысы екінші раундта-ақ техникалық нокаутқа кетіп, жұдырықтасуды жалғастырудан бас тартты. 85 келіде өзбек Рамжон Ахмедов те жақсы өнер көрсетуге тырысқан секілді еді. Алайда, америкалық клубта өнер көрсететін беларус Сергей Корнеевтің тәжірибесі басым екені байқалды. «Арландар» сапындағы кешегі күннің жалғыз легионері — шымыр денелі өзбек бауырымыз Р. Ахмедов Сергей Корнеевке қанша пәрмен көрсеткенімен, айласын асыра алмады. Қорытынды есеп — 47:48. 46:49. 46:49. Дегенмен, бұл «Астана Арландарының» жалғыз жеңілісі болды. Бұдан кейінгі 91 келіден жоғары ең ауыр салмақтағы Руслан Мырсатаев та өз қарсыласы марокколық Мохаммед Арджауидың сағын сындырды. Қапталда отырған үш қазының екеуі жеңісті Русланға берсе, біреуі тең есеп ұсынған.
Сөйтіп, «Астана Арландары» жарады. Бұл жеңіс боксшыларымыздың ширек финалға шығуына үлкен мүмкіндік береді. Естеріңізге салсақ, бүгінгі күні «Арландар» өз тобында миландықтардан кейінгі екінші орында.
