Бұл туралы Сaravan.kz медиа порталы Sputnik.kz-ке сілтеме жасап хабарлайды.
«Ресей – Ислам әлемі» халықаралық экономикалық форумында 120 келісімге қол қойылды. KazanForum 2024 іс-шарасына 87 ел мен Ресейдің 87 аймағынан 20 мыңнан астам адам қатысты.
Атап айтқанда, KazanForum-да Қазақстан мен Ресей Солтүстік-Оңтүстік көлік дәлізін дамыту үшін жол төсеу жұмыстарын үйлестіруге келісті.
Бұл халықаралық көлік артериясы Санкт-Петербургтен Үндістанның Мумбай қаласына дейінгі ұзындығы 7200 шақырым жолды құрайды және Қазақстан аумағы арқылы өтеді. Ол қолданыстағы көлік бағыттарына, мысалы, Суэц каналы арқылы өтетін теңіз жолына жылдамырақ (2 есе) және арзан балама болуға арналған.
Бұған дейін хабарланғандай, жыл сайынғы «Ресей – Ислам әлемі: KazanForum» халықаралық экономикалық форумы аясында Ресей үкіметі төрағасының орынбасары Марат Хуснуллин Татарстан Республикасының басшысы Рустам Миннихановпен бірге ҚР премьер-министрінің орынбасары Серік Жұманғаринмен жұмыс кездесуін өткізді.
Ресей Қазақстанның жетекші сауда-экономикалық серіктестерінің бірі саналады. Өткен жылдың соңында өзара сауда 28,5 миллиард долларға дейін өсті. Бұған «Солтүстік-Оңтүстік» халықаралық көлік дәлізінің белсенді дамуы да ықпал етуде.
Инфрақұрылымды жаңғырту, терминалдар қуаттылығы мен жылжымалы құрамды ұлғайту, тасымалдаушыларға қолайлы жағдай жасау бойынша бірлескен жұмыс жолға қойылған.