Денсаулық сақтау министрлігінің санитарлық-эпидемиологиялық бақылау комитеті қауесетке түсініктеме берді, — деп хабарлайды Caravan.kz медиа порталы Tengrinews.kz -ке сілтеме жасап.
WhatsApp чаттарында тараған хабарламаға сәйкес, қашықтан оқу 15 қыркүйектен басталады. «15 қыркүйектен бастап балалар қашықтан оқуға жіберіледі деп жатыр. Тағы да маска режимі. Қандай да бір вирус тарап жатыр екен», — делінген хабарламада, оның авторы белгісіз.
Санитарлық-эпидемиологиялық бақылау комитеті ақпаратты жоққа шығарды. Ал 15 қыркүйектен бастап тұмауға қарсы вакцинация басталады.
«15 қыркүйектен бастап балалар қашықтан оқуға жіберіледі және мекемелерде маска режимі енгізіледі» деген мессенджерлерде тараған ақпарат шындыққа жанаспайды.
Жыл сайын эпидемиялық маусым кезеңінде профилактикалық және эпидемияға қарсы іс-шараларды өткізуді көздейтін бас мемлекеттік санитариялық дәрігердің қаулысы бекітіледі. Қаулыға сәйкес, биыл 15 қыркүйектен бастап тұмауға қарсы вакцинация жүргізу басталады. Маска режимі тек медициналық ұйымдардың қызметкерлері үшін енгізіледі. Барлық азаматты ресми ақпарат көздерінен сенімді ақпаратқа сенуге шақырамыз», — деп хабарлады комитет.