Бұл дәстүрге Нұрсұлтан Назарбаев Қоры ұзақ жыл бойы қолдау көрсетіп келеді. Бұл күні балалар үйлерінің, түзету мектеп-интернаттарының және басқа да әлеуметтік мекемелеріндегі 300 бала үшін Almaty Theatre сахнасында ұмытылмас «Жаңа жылдық сиқырлы шоу» ұйымдастырылды.
Бұл мереке өмірінде қиындық көріп жүрген балалар үшін керемет сыйлық болды. Олар үшін бұл күн бақытқа, мейірімге және ғажайыпқа деген сенімге толы еді.
Әлемнің түкпір-түкпірінен келген Аяз Ата, Дед Мороз, Санта-Клаус, үндістандық Аяз Ата және итальяндық Бефана феясы т.б. сахнаның сәнін кіргізді. Сиқырлы кейіпкерлер таңғажайып ертегі айтумен қатар, балаларды интерактивті ғажайыпқа елітіп, әр бүлдіршінді сиқырлы оқиғаға саяхаттауға тартты.
Қойылым басталғанға дейін балалар қызықты шеберлік дәрістерге қатысып, интерактивті аймақта асыр салып ойнап, шығармашылық қабілетін шыңдады. Жүзі қуаныштан бал-бұл жайнаған балалардың шат күлкісі мен бақытты сәті бүкіл залды қуанышқа бөледі.
Бұл мереке балаларға көңіл бөлу, қамқорлық көрсету мен кемел келешекке деген сенім ұялатудың қаншалықты маңызды екенін көрсетті. Нұрсұлтан Назарбаев Қоры ерекше қолдауға мұқтаж жандарға көмектесуді, адам жанын елжіретіп, көңілге қуаныш сыйлайтын іс-шаралар ұйымдастыруды абыройлы жалғастырып келеді.
Тәрбиешілер мен педагогтар осы мерекеге мұрындық болғандарға алғыс айтып, балаларға шаттық пен бақыт сыйлайтын бұл игі дәстүрдің жалғасын табатынына сенім білдірді.
