Бұл туралы Caravan.kz медиа порталы Zakon.kz-ке сілтеме жасап хабарлайды.
Респонденттердің қатарына нарықтың кәсіби қатысушылары, зерттеу институттары, халықаралық ұйымдар мен рейтингтік агенттіктер (Еуразиялық даму банкі, Еуразиялық экономикалық комиссия, Экономикалық зерттеулер институты және жеке банктер) кіреді.
Сарапшылар сауалнаманы бірқатар параметрлерге сүйене отырып өткізді: Brent маркалы мұнайдың бағасы, Қазақстан экономикасының өсімі, инфляция, базалық мөлшерлеме, тауарлар мен қызметтердің экспорты және импорты, сондай-ақ теңге бағамы.
Осы жылдың қаңтар айында 2025 жылға арналған мұнай бағасы бойынша сценарий шарттары жаңартылған. Медианалық күтулерге сәйкес 2025 жылы Brent маркалы мұнайдың бағасы барр. үшін 75,0 АҚШ долл. деңгейінде қалыптасады (бұған дейін – 76,5 АҚШ долл.). 2026 жылға болжам баррель үшін 74,0 АҚШ доллар деңгейінде сақталған. 2027 жылға күтулер 75,0 АҚШ доллар деңгейінде қалыптасты.
Қазақстанның 2025 және 2026 жылдарға арналған экономикалық өсу болжамдары өзгеріссіз қалып, тиісінше 4,7% және 4,5% құрайды. 2027 жылы сарапшылардың күтуі бойынша экономикалық өсу қарқыны 4,5% деңгейінде сақталады.
Сурет: ҚР Ұлттық Банкі
Сарапшылар инфляция болжамдарын 2025 жылға — 6,9%-тен 7,5%-ке дейін, ал 2026 жылға — 6,0%-тен 6,5%-ке дейін көтерді. 2027 жылы инфляция 5,6% деңгейінде бағаланады.
Инфляцияға қатысты бағалаулардың өзгеруіне сәйкес базалық мөлшерлеме бойынша күтулер де қайта қаралды. 2025 жылға арналған болжамдардың медианалық мәндері 12,5%-тен 14,7%-ке дейін, 2026 жылға — 10,3%-тен 11,8%-ке дейін түзетілді. 2027 жылға базалық мөлшерлеме 10,5% деңгейінде болжанады.
Доллардың теңгеге шаққандағы бағамы бойынша болжамдар да құлдырау жағына қарай біршама қайта қаралды. 2025 жылы теңгенің орташа бағамы 486,9 теңгеден 514,5 теңгеге дейін, 2026 жылға – 498,3 теңгеден 530 теңгеге дейін, 2027 жылға – бір доллар үшін 550 теңгеге көтерілді.
Сондай-ақ, Ұлттық Банк сауалнамаға реттеушінің болжамдары кірмейтінін атап өтті. Онда нарықтағы кәсіби қатысушылардың ішкі және әлемдік нарықтардағы ахуалдың дамуы жайында тәуелсіз пікірлеріне, бағалауларына және күтулеріне шолу жасалған.