Бұл туралы Caravan.kz медиа порталы Tengritravel.kz-ке сілтеме жасап хабарлайды.
Ұлттық тасымалдаушы көктемнен бастап билет бағасы 7 пайызға қымбаттайтынын мәлімдеді.
«Жолаушылар тасымалы» мәліметінше, жол жүру құнының өзгеруі «Теміржол көлігі туралы» заңның 12-тарауы 94-бабы 2-тармағына сәйкес келеді.
«Жолаушылар тасымалы» 2025 жылғы 1 наурыздан бастап барлық әлеуметтік маңызы бар облысаралық бағыттарға және кейбір қала маңы пойыздарына билет бағасының шекті деңгейінің (тарифінің) өзгеретіні туралы хабарлайды. Бұл тасымалдаушының жолаушыларды әлеуметтік маңызы бар бағыттарда тасымалдауға байланысты шығындарын ұзақ мерзімді субсидиялау шарттарына сәйкес 7 пайыздық жоспарлы индекстеуге негізделген», – деп мәлімдеді компания өкілдері.
Айта кетейік, 2024 жылғы 1 қазаннан бастап кейбір пойыз бағыттарына билет бағасы қымбаттаған болатын. Күзде Көлік министрлігі елде 140 жолаушылар бағыты бар екенін, ал тарифтің көтерілуі тек 62 бағытқа әсер еткенін мәлімдеген еді.
«Бұл вагон паркін жаңарту, көрсетілетін қызметтердің сапасын жақсарту және қызметкерлердің жалақысын көтеру үшін қажет. Сонымен қатар, соңғы 10 жылда әлеуметтік маңызы бар бағыттар бойынша жолаушылар тасымалы тарифтері инфляция деңгейіне индекстеуді қоспағанда, көтерілмегенін ескеру маңызды», – деп түсіндірген болатын министрлік өкілдері.
«Жолаушылар тасымалы» компаниясының баспасөз қызметінен билет бағасының жаңа қымбаттауына қатысты егжей-тегжейлі ақпарат сұраттық.
«Баға көтеру барлық әлеуметтік маңызы бар пойыздарға қатысты болады, тек №29, 71, 102, 112 пойыздарына, сондай-ақ «Тальго» құрамындағы «Гранд купе» және «Бизнес» вагондарына әсер етпейді», – деп хабарлады компания.
Осылайша, жарты жыл ішінде жол жүру тарифтері екі рет қайта қаралды. Бірінші жағдайда – «вагон паркін жаңарту, көрсетілетін қызметтер сапасын жақсарту және қызметкерлердің жалақысын көтеру» мақсатында, ал екінші рет – «жоспарлы индекстеуге» байланысты.