Бұл туралы Caravan.kz медиа порталы Sputnik.kz-ке сілтеме жасап хабарлайды.
«ҚазТрансОйл» АҚ «Өзен – Атырау – Самара» және «Қаламқас – Қаражанбас – Ақтау» магистральдық мұнай құбырлары учаскелерін қайта құру жұмыстарын аяқтады, деп хабарлады компанияның баспасөз қызметі.
Бұл жұмыстар Қазақстанның ішкі нарығына мұнай айдау қызметінің 2020-2025 жылдарға арналған инвестициялық бағдарламасының аясында жүзеге асты.
Нәтижесінде мұнай тасымалы тұрақты түрде артып, өндірістік және экологиялық қауіпсіздікті қамтамасыз етеді. Сондай-ақ мұнай тасымалы жүйесінің негізгі бағыттарында төтенше жағдайлар тәуекелін төмендетуге негізделген.
«Өзен – Атырау – Самара» магистральдық мұнай құбырының диаметрі 1020 мм, жалпы ұзындығы 30 км екі учаске қайта құрылды. Жоба аясында құбырдың негізгі бөлігін ауыстыру, 2 дана 1000 мм диаметрлі құлыптау арматурасын орнату, сондай-ақ мұнай тасымалы параметрлерін жедел бақылауды қамтамасыз ететін автоматтандыру және телемеханика жүйелері енгізілді», — дейді компания.
«Қаламқас – Қаражанбас – Ақтау» мұнай құбырының диаметрі 530 мм, 23 км учаскесінде қайта құру жұмыстары аяқталды. Жұмыс барысында 0-ден 23 км-ге дейінгі желілік бөлігі ауыстырылды. Учаскеде басқару пунктінің жабдықтарына электр энергиясын жеткізетін қайта жаңартылатын энергия көзі орнатылды. 23 км-де жаңа желілік түйінді орнату, тазалау және диагностика құралдарын қосу камерасын салу, дренаж және технологиялық параметрлерді бақылау жүйесін іске асыру жұмыстары жүргізілді.
«Екі учаскені қайта құру аясында құбырларға қосымша зауыттық оқшаулау жабдықтары қолданылып, коррозиядан сенімді қорғаныс қамтамасыз етілді. Электрмен жабдықтау және электрохимиялық қорғау жүйелері жаңартылып, қазіргі өнеркәсіптік және экологиялық қауіпсіздік талаптарына сай заманауи жабдық орнатылды», — дейді «ҚазТрансОйл».