Бұл туралы Caravan.kz медиа порталы Tengrinews.kz-ке сілтеме жасап хабарлайды.
Лондонның ICE биржасында маусымдағы Brent мұнай фьючерстерінің бағасы 1,86 пайызға өсіп, барреліне 110 доллардан асты. Бұған Астана уақыты бойынша сағат 11:00-дегі сауда-саттық мәліметтері дәлел.
WTI маркалы мұнайдың маусымдағы фьючерстері 1,84 пайызға қымбаттап, барреліне 98,15 долларға жетті.
Еске сала кетейік, бұған дейін АҚШ пен Иран арасындағы бейбіт келіссөздердің екінші кезеңінің сәтсіз аяқталғаны туралы хабарға мұнай нарықтары теріс реакция білдірді. Таяу Шығыстағы мұнай өңдеу зауыттарын атқылаудың тұрақты қаупінен бөлек, Ормуз бұғазының бұғатталуы нарықтар үшін басты түйткіл болып қала бермек.
27 сәуірде Brent маркалы мұнай бағасы үш пайызға жуық көтеріліп, барреліне 108 доллар деңгейінде тұрақтады. Осылайша, апталық өсім 13 пайыз болды.
Қазақстандағы мұнай бағасының өсуі: бюджет үшін тиімді, бірақ экономика үшін қауіпті
Бұған дейін мұнай-газ саласының сарапшысы Асқар Исмаилов мұнай бағасының өсуі Қазақстан бюджетіне қосымша табыс әкелетінін, Ұлттық қорды нығайтып, сауда балансын жақсартатынын және теңге бағамын қолдайтынын атап өткен болатын.
Дегенмен мұнай нарығындағы жоғары құбылмалылық экономикаға қауіп төндіреді. Бағаның ауытқуы инфляцияға, инвестицияларға және қаржы нарықтарына әсер етуі мүмкін. Экономиканың мұнай табысына тәуелділігі Қазақстанды сыртқы соққылар мен әлемдік бағаның күрт өзгеруіне сезімтал етеді.
2026–2028 жылдарға арналған бюджетте мұнай бағасы барреліне 60 доллар, ал доллар бағамы 540 теңге деңгейінде бекітілген. Бұл көрсеткіштер экспорттан түсетін табысты, әлеуметтік төлемдерді және бюджеттік бағдарламалардың шығыстарын есептеу үшін қолданылады.