Бұл туралы Аустрия Республикасының Еуропа және халықаралық істер жөніндегі федералдық министрі Беате Майнль-Райзингер БАҚ-қа мәлімдемесінде айтты, деп жазды Caravan.kz медиа порталы kaz.inform.kz-ке сілтеме жасап.
Оның айтуынша, елде көптеген аустриялық компаниялар жұмыс істейді. Сапар аясында бірге келген бизнес-делегация экологиялық технологиялар, энергия тиімділігі, машина жасау және өнеркәсіп сияқты салалардағы ынтымақтастықты талқыламақ.
– Мен қарым-қатынасымыздағы оң динамиканы және зор әлеуетті көріп отырмын. Соның ішінде Қазақстанның геосаяси рөлі мен географиялық орналасуы ескеруге тұрарлық. Бұл сапарға еліміздің ішкі істер министрімен бірге келіп отырмын, сондай-ақ бүгін Қазақстанның ішкі істер министрімен кездесу жоспарланған. Біз энергетика, саясат, қауіпсіздік және экономика салаларындағы ынтымақтастық әлеуетін толық жүзеге асырғымыз келеді, – деді Беате Майнль-Райзингер ҚР Сыртқы істер министрлігінде өткен брифингте.
Спикердің айтуынша, көптеген аустриялықтар үшін Қазақстан алыс ел болып көрінуі мүмкін, бірақ шын мәнінде ол ойлағаннан әлдеқайда жақын.
– Біз Қазақстанда аустриялық компаниялардың белсенді жұмыс істеп жатқанын атап өттік. Сонымен бірге, қауіпсіздік пен энергиямен қамтамасыз ету мәселелері маңызды болып қала береді. Әлем қарқынды өзгеріп жатыр, геосаяси шиеленіс күшеюде, дағдарыстар мен қақтығыстар артып келеді. Күннен-күнге саяси мүдделер келіссөз үстелінде емес, ұрыс алаңында шешіліп жатыр. Бұл қауіпті үрдіс. Біздің елдерге ережелерге негізделген тәртіп қажет. БҰҰ Жарғысы сияқты нормалар сақталуы тиіс, ал шекаралар күшпен өзгертілмеуі керек. Біз қазіргі дағдарыстар мен қақтығыстарды талқылап, дипломатиялық шешімдер қажет екенін атап өттік, – деді Аустрия федералдық министрі.
Сонымен бірге, тараптар Ауғанстан мәселесін де талқылаған. Соңғы уақытта ол халықаралық күн тәртібінде екінші орынға ысырылғанымен, ондағы жағдай, әсіресе гуманитарлық тұрғыда, әлі де күрделі және назар аударуды қажет етеді, дейді спикер.
– Біз Қазақстанды өңірдің өзіндік «сейсмографы» ретінде қарастырамыз. Өтіп жатқан үдерістерді түсіну үшін көрші елдермен диалог жүргізу маңызды. Бұл өзгерістерді алдын ала анықтауға және сын-қатерді бағалауға мүмкіндік береді. Біз тұрақтылыққа, терроризммен, экстремизммен және заңсыз көші-қонмен күреске мүдделіміз және бұл жұмысты Қазақстан сияқты серіктестермен бірге бастаймыз, – деді Б. Майнль-Райзингер.
Бүгінде Қазақстан мен Аустрия саясат пен қауіпсіздік салаларында ортақ мүдделерге ие.
– Біз өзара іс-қимылға, соның ішінде халықаралық ұйымдар арқылы, мысалы, ЕҚЫҰ аясындағы шараларға үлкен мән береміз. Осыған байланысты ертең Астана әуежайындағы осы ұйым нысанын аралаймыз, онда аустриялық технологиялар Қазақстан шекарасының қауіпсіздігін нығайтуға ықпал етуде. Бұл – практикалық ынтымақтастық пен бірлескен әрекеттердің нақты мысалы. Энергетика және жеткізілімдердің сенімділігі маңызды бағыт болып қала береді. Қазақстан энергиямен қамтамасыз етуде маңызды рөл атқарады. Таяу Шығыстағы шиеленістің өсуі жағдайында бұл ерекше маңызға ие. Біз Қазақстаннан мұнай аламыз және ол кәсіпорындардың жұмысын, дүкендердің жабдықталуын және көлік қызметін қамтамасыз ететін жеткізу тізбектерінің бір бөлігі саналады. Үздіксіз жеткізілім кепілдігі өздігінен қалыптаспайды. Біз Қазақстанның сенімді серіктесі болып қала беруді жалғастыруға ниеттіміз, – деді Беате Майнль-Райзингер.
Айта кетейік, Аустрия Республикасының Еуропа және халықаралық істер жөніндегі федералдық министрі Беате Майнль-Райзингер ресми сапармен Астанаға келді. Сапар аясында ол Қазақстанның Сыртқы істер министрі Ермек Көшербаевпен кездесті.
Сонымен бірге, Аустрия Астана әуежайына 25 паспорт оқу құрылғысын табыстайды.