Бұл туралы Caravan.kz медиа порталы baq.kz-ке сілтеме жасап хабарлайды.
Реттеуші органдар қарыздар мен микрокредиттер бойынша жылдық тиімді сыйақы мөлшерлемесінің шекті деңгейін жаңартты. 1 шілдеден бастап ипотека бойынша шекті мөлшерлеме 25%-дан 20%-ға дейін төмендейді.
Қаржы нарығын реттеу және дамыту агенттігі Ұлттық банкпен бірлесіп жылдық тиімді сыйақы мөлшерлемесіне қатысты қаулы жариялады. Құжат 16 мамырдан бастап күшіне енеді. Алайда көптеген несие бойынша мөлшерлемелер 1 шілдеден бастап жаңартылады.
Кредиттердің басым бөлігі бойынша ЖТСМ бұрынғы деңгейде қалады. Тек бір өзгеріс бар:
- кепілсіз банктік қарыздар бойынша – жылдық 46%-ға дейін;
- кепілмен қамтамасыз етілген банктік қарыздар бойынша – жылдық 35%-ға дейін;
- ипотекалық тұрғын үй қарыздары бойынша – 16 мамырдан бастап 25%-ға дейін, ал 1 шілдеден бастап ЖТСМ 20%-ға дейін төмендейді.
Осылайша, ипотека бойынша шекті мөлшерлеме 1 шілдеден бастап 20%-ға дейін азаяды.
Ал микрокредиттер бойынша 16 мамырдан бастап мөлшерлемелер өзгеріссіз қалады:
- микрокредиттер үшін – жылдық 46%-ға дейін,
- ал мерзімі 45 күнге дейінгі қысқа мерзімді микрокредиттер үшін – күніне 0,3% және жылдық 179%.
Бұл ретте қарыз сомасы 45 АЕК-тен аспауға тиіс.