Бұл туралы Ауыл шаруашылығы министрлігі хабарлады, деп жазды Caravan.kz медиа порталы kaz.inform.kz-ке сілтеме жасап.
Қазақстандағы маусымдық аллергияның ең кең таралған түрлерінің бірі – жусан тозаңына аллергия. Отандық клиникалық-диагностикалық зертханалардың мәліметінше, жусан тозаңына сезімталдық барлық тозаң аллергені ішінде бірінші орында тұр, яғни 30%. Әсіресе Алматы қаласы үшін өзекті. Себебі мұнда жусанның гүлдеу кезеңі шілдеден қарашаға дейін жалғасады. Осы уақытта мыңдаған адам мұрынның бітелуі, түшкіру, көзден жас ағу және өмір сапасының төмендеуі жағдайларына тап болады.
Қолданыстағы емдеу тәсілдері негізінен ауру белгілерін уақытша жеңілдетуге бағытталған, дерттің негізгі себебін толық жоймайды. Ал дәстүрлі аллерген-спецификалық иммунотерапия бірнеше жыл бойы ұзақ ем қабылдауды әрі препараттарды бірнеше мәрте енгізуді талап етеді.
Қазақстанның Денсаулық сақтау министрлігі ғылыми-техникалық бағдарламасы аясында ғалымдар PollenVax атты жаңа отандық препаратты әзірледі. Препарат OtarBioPharm базасында халықаралық GMP стандартына сәйкес өндіріліп жатыр.
Бұл жусан тозаңы аллергенінің рекомбинантты ақуызы негізінде жасалған. Оның басты ерекшелігі — емдеу курсының едәуір қысқартылуы. Терапия аптасына бір рет жасалатын төрт теріасты инъекциясынан тұрады.
Бұған дейін 30 еріктінің қатысуымен клиникалық зерттеудің I кезеңі сәтті аяқталды. Зерттеу нәтижесінде препараттың қауіпсіздігі дәлелденіп, адам ағзасына жақсы қабылданатыны анықталды. Сондай-ақ аллергенді бейтараптандыратын антиденелердің түзілуі және терілік прик-тест нәтижелері бойынша аллергенге сезімталдықтың төмендеуі секілді оң иммунологиялық көрсеткіштер тіркелді.
Қазіргі таңда II кезеңдегі клиникалық зерттеуді өткізуге ресми рұқсат берілді.
Аталған зерттеу — жусан тозаңынан туындаған аллергиялық риниті расталған, жасы 18 бен 65 жас аралығындағы 138 пациенттің қатысуымен жүргізілетін рандомизацияланған, қос соқыр, плацебо-бақыланатын клиникалық сынақ.
Зерттеуге қатысу мерзімі 180 күнге дейін созылады.
Бұл жобаның жүзеге асырылуы отандық биофармацевтиканың дамуына серпін беретін маңызды қадам саналады. Сонымен қатар денсаулық сақтау саласындағы өзекті мәселелерді шешуге бағытталған заманауи инновациялық препараттарды әзірлеудегі қазақстандық ғылымның әлеуетін айқын көрсетеді.
Алматылықтар арасындағы аллергияның негізгі себебі аталғанын жазған едік.