Бұл туралы Caravan.kz медиа порталы Tengrinews.kz-ке сілтеме жасап хабарлайды.
Бұл туралы Сенатта арнаулы мемлекеттік органдардың қызметі мәселелеріне арналған заң жобасын қарау барысында белгілі болды.
«Заң жобасында арнаулы мемлекеттік органдар жүйесін жаңғыртуға, соның ішінде кадр саясаты, қызмет тиімділігін арттыру және ұлттық қауіпсіздікті қамтамасыз ету шараларын күшейту мәселелеріне ерекше назар аударылған. Сонымен қатар жас мамандарды арнаулы мемлекеттік органдардың жедел бөлімшелеріне қабылдау үшін жас мөлшерін алып тастау ұсынылады», — деді сенатор Сергей Карплюк.
Осыған байланысты сенатор жоғары жауапкершілік деңгейін, мемлекеттік құпияға қолжетімділікті және ҰҚК жұмысының ерекшелігін ескере отырып, 23 жасқа толмаған мамандар үшін іріктеу, даярлау және бақылаудың қандай қосымша тетіктері қарастырылатынын сұрады.
ҰҚК төрағасының орынбасары Алмаз Амантаев жас шектеуін алып тастау кандидаттарға қойылатын талаптарды жеңілдетуді білдірмейтінін мәлімдеді.
«Жас мамандарды іріктеу заңда белгіленген барлық процедурадан міндетті түрде өту арқылы жалпы негізде жүргізіледі. Сөз медициналық куәландыру, психофизиологиялық зерттеу, кәсіби және дене шынықтыру дайындығы деңгейін тексеру, сондай-ақ моральдық және іскерлік қасиеттерді бағалау туралы болып отыр», — деді ол.
Төраға орынбасарының айтуынша, кандидаттардың өзіне және олардың жақын туыстарына қатысты арнайы тексеру де жүргізілмек.
«Мемлекеттік құпияларға қол жеткізуге келетін болсақ, ол барлық міндетті тексеру рәсімі өткізіліп, тиісті рұқсат ресімделгеннен кейін ғана беріледі», — деп түсіндірді Амантаев.
Жас жедел қызметкерлер үшін қызметтің бастапқы кезеңінде бейімделу тетіктері қарастырылады. Олар: қосымша кәсіби даярлық, дербес жедел жұмысқа кезең-кезеңімен жіберу, сондай-ақ тәжірибелі тәлімгерлер тарапынан бақылау.
«Түзетулер тұтастай алғанда ең талантты жастарды тарту мүмкіндіктерін кеңейтуге бағытталған», — деді арнайы қызмет өкілі.
Сондай-ақ ол неге нақ 23 жасқа дейінгі кезең туралы сөз болып отырғанын түсіндірді.
«Қазір балалардың көбі 6 жасында мектепке барады, 16–17 жасында орта білім алады, содан кейін жоғары оқу орнына түсіп, оны шамамен 20–21 жасында бітіреді. Осыған байланысты 21 мен 23 жас аралығындағы алшақтық түлектерге жоғары оқу орнын бітірген бойда ұлттық қауіпсіздік органдары мен әскери құрылымдарға қызметке орналасуға мүмкіндік бермейді», — деді Алмаз Амантаев.
Мән-жайы
Бұған дейін көктемгі әскерге шақыру туралы хабарланған болатын. Барлығы 21 мың адамды әскерге жіберу жоспарланған еді. Оның 2 мыңы — ҰҚК Шекара қызметіне, тағы 300-ге жуығы — Мемлекеттік күзет қызметіне.