Алматыда толықтай электрлі көліктерден тұратын жаңа такси сервисі ресми түрде іске қосылды. Вьетнамда құрылған компания үшін Қазақстан Орталық Азиядағы алғашқы нарыққа айналып отыр. Ал Алматы жаңа өңірдегі алғашқы қала ретінде таңдалды. Қазақстандықтар су жаңа такси көліктерін қалай қабылдады? Caravan.kz медиа порталының тілшісі анықтап білді.
Сарапшылардың пікірінше, жаңа халықаралық ойыншының келуі Қазақстандағы такси нарығындағы бәсекені күшейтіп, экологиялық көлік пен заманауи мобильділік шешімдеріне деген қызығушылықты арттыруы мүмкін.
Алматы неге таңдалды?
Жаңа қызмет үшін Алматы Қазақстандағы алғашқы әрі негізгі нарық. Мұның бірнеше себебі бар. Біріншіден, қала халқының саны көп әрі такси қызметіне сұраныс жоғары. Екіншіден, мегаполистегі көлік тығыздығы мен ауа сапасы мәселесі экологиялық таза көлік түрлеріне деген қажеттілікті арттырып отыр.
Соңғы жылдары Алматыда ауаның ластануы жиі талқыланып келеді. Мұндай жағдайда атмосфераға зиянды қалдық шығармайтын электрлі көліктерді пайдалануға негізделген сервистің іске қосылуы қаланың көлік инфрақұрылымындағы маңызды өзгерістердің бірі ретінде қарастырылуда.
Компанияның мәліметінше, алғашқы кезеңде қызмет тек Алматыда жұмыс істейді. Кейін өз қызметін Қазақстанның басқа қалаларына да кеңейтуді жоспарлап отыр.
Оқи отырыңыз: «Газ камерасына» тең: Алматының ауасы қашан тазарады?
Автопарк толықтай электрлі кроссоверлерінен тұрады. Бұл көліктер қалалық ортада күнделікті пайдалануға арналған.
Электромобильдердің басты артықшылықтарының бірі – атмосфераға зиянды шығарындылардың болмауы. Сонымен қатар олар тыныш қозғалысымен, заманауи қауіпсіздік жүйелерімен және жолаушыларға арналған жайлы салонымен ерекшеленеді.
Әлемнің көптеген елдерінде қоғамдық және жеке көліктерді электрлендіру үрдісі күшейіп келеді. Сондықтан сервис те Қазақстан нарығына дәл осы бағыттағы тәжірибесін алып келіп отыр.
Оқи отырыңыз: Алматыны қара түтін басты: Билік халыққа экологияны жақсартуға мүмкіндік бермей отыр — экобелсенді
Жай ғана такси емес
Компания өзін тек көлік шақыру сервисі ретінде емес, ақылды қалалық мобильділік платформасы ретінде таныстырып отыр.
Компания сапар сапасына, қауіпсіздікке және клиенттерге қызмет көрсету мәдениетіне ерекше назар аудармақ. Осы мақсатта компания жүргізушілерді арнайы даярлау бағдарламасын енгізуде.
Бағдарлама аясында жүргізушілер операциялық стандарттар, жол қауіпсіздігі, клиенттермен жұмыс істеу және сервистік мәдениет бойынша кешенді оқытудан өтеді.
Компанияның айтуынша, бұл жолаушылар үшін сапар сапасының тұрақты болуына, қауіпсіздік деңгейінің артуына және қызмет көрсету стандарттарының бірізденуіне мүмкіндік береді.
Алматыдағы ресми таныстырылым
Жаңа қызметтің ресми іске қосылу рәсімі Алматы қаласында өтті. Іс-шараға Вьетнамның Қазақстандағы Төтенше және Өкілетті Елшісі Нгуен Тхань Ле, Алматы қаласы Кәсіпкерлік және инвестициялар басқармасының басшысы Берікбол Мәндібаев, Қазақстан Үкіметінің өкілдері, дипломатиялық корпус мүшелері, бизнес қауымдастықтар, сондай-ақ көлік, энергетика, технология, қаржы, инфрақұрылым және қызмет көрсету салаларының өкілдері қатысты.
Таныстырылым барысында компания Қазақстан нарығындағы даму стратегиясын ұсынды. Компания өкілдері электрлі автопарк құруға, жүргізушілерді даярлауға, цифрлық технологияларға және тұрақты даму қағидаттарына басымдық беретінін мәлімдеді.
Жаңа серіктестік экожүйесі қалыптаспақ
Іс-шара барысында Green Alliance Frontier бастамасы аясында бірнеше стратегиялық әріптестік келісімдерге қол қойылды.
Бұл бастама көлік, туризм, технология және қызмет көрсету салаларында тұрақты даму қағидаттарын қолдайтын ұйымдарды біріктіруге бағытталған.
Компанияның көзқарасы бойынша, болашақта электрлі мобильділік тек көлік қызметімен шектелмей, түрлі салаларды қамтитын кең экожүйеге айналуы тиіс.
Сондықтан аталған компания Қазақстанда тек такси қызметін дамытуды ғана емес, сонымен қатар электрлі көлік төңірегінде жаңа серіктестік желісін қалыптастыруды мақсат етіп отыр.
Қазақстан – стратегиялық нарық
Компанияның жаһандық бас директоры Нгуен Куок Туан Қазақстанды жоғары әлеуетке ие және қарқынды дамып келе жатқан нарық ретінде бағалайды.
Оның айтуынша, елде заманауи сервистерге сұраныс артып келеді, ал компания Қазақстанға ұзақмерзімді инвестициялық жоспармен келген.
«Біз жергілікті серіктестермен бірге адамдардың күнделікті қажеттіліктеріне жауап беретін сапалы әрі заманауи мобильділік шешімдерін дамытуға ниеттіміз», – деді компания басшысы.
Пайдаланушыларға арналған ұсыныс
Сервистің іске қосылуына орай компания арнайы акция жариялады.
«Компанияның мобильді қосымшасы арқылы рәсімделген сапарларға 26 пайыз жеңілдік қарастырылған. Жеңілдік мөлшері 2626 теңгеге дейін жетеді», — деп жазды экономист Айбар Олжаев.
Қосымша Қазақстан пайдаланушылары үшін App Store және Google Play платформаларында қолжетімді.
Қазақстан нарығына қандай өзгеріс әкелуі мүмкін?
Соңғы жылдары Қазақстанның такси нарығында бірнеше ірі ойыншының ықпалы басым болып келді. Сондықтан жаңа халықаралық сервистің келуі нарықтағы бәсекені күшейтуі мүмкін деген пікірлер айтылуда.
Бәсекенің артуы қызмет көрсету сапасының жақсаруына, жаңа технологиялардың енгізілуіне және пайдаланушылар үшін қолайлы ұсыныстардың көбеюіне ықпал етуі ықтимал.
Сонымен қатар толықтай электрлі көліктерге негізделген модел Қазақстандағы экологиялық көлік инфрақұрылымының дамуына да серпін беруі мүмкін.
Орталық Азияға ашылған қақпа
2023 жылы Вьетнамда құрылған компания бүгінде Вьетнам, Лаос, Индонезия, Филиппин, Үндістан және Қазақстан нарықтарында жұмыс істейді.
Қазақстан компанияның алтыншы халықаралық нарығына айналды. Ал Алматыдағы іске қосылу компания үшін Орталық Азияға шығудың алғашқы қадамы болып отыр.
Егер сервис жергілікті нарыққа сәтті бейімделіп, тұрақты жұмыс моделін қалыптастыра алса, алдағы жылдары мұндай электрлі такси қызметтері Қазақстанның басқа да ірі қалаларында пайда болуы әбден мүмкін.
Қалай болғанда да, Алматы үшін бұл жоба тек жаңа такси сервисі емес. Бұл – экологиялық көлікке көшу, цифрлық шешімдерді енгізу және қалалық мобильділіктің жаңа мәдениетін қалыптастыру жолындағы маңызды қадамдардың бірі.
Қолданушылар не дейді?
Әлеуметтік желіде жаңа такси туралы түрлі пікірлер айтылуда. Мысалы, кейбірі нарықты жаулап алған бәріне белгілі такси қызметіне бәсекелес бола алмайды деген болжам айтуда. Себебі жаңа такси қызметі көлікті өздері ұсынады, ал олардың саны шектеулі болуы мүмкін. Ал басқалары бағасының қолжетімді екенін айтып, тіпті жаңбырлы немесе жұмыс күні соңында да бағасы өспейтінін жазуда. Қазір мобильді қосымша іске қосылған, алайда барлық бағыттарға такси шақыру мүмкін емес. Мүмкін әлі тестілеу режимі аяқталмаған шығар.
Сондай-ақ қолма-қол төлем функциясы жоқ, дәл осы көпшілік үшін ыңғайсыз, себебі бұл сақтықтың белгісі екенін айта кеткен жөн.
Одан бөлек айтылып жатқан пікірлерде салоны тар, такси шақырып жатқан кезде көлік келмей тұрып, жол ақысы картадан бірден шешілетінін жазғандар да бар. Қорытындылай келе, қолайсыз тұстары болса да, халықтың көпшілігі жаңа экотаксидің нарыққа кіргеніне қуанып, қолдауға дайын екенін білдірді.