Бұл туралы LIDER.KZ еріктілері Instagram-парақшасында жазды, — деп хабарлайды Tengrinews.kz
2009 жылғы 27 шілдеде туған Ясмина Шерзатқызы Шертаева 21 шілдеде шамамен сағат 23:30-да Қарасай ауданындағы үйінен шығып кеткен. Содан бері қайта оралмаған.
Қолда бар мәліметке сүйенсек, қыз кейінгі рет Қарасай ауданындағы «Долан» аялдамасында, «Бамбарбия Кергуду» ресто-бары жағынан орнатылған бейнебақылау камераларына түсіп қалған. Алайда оның одан әрі қандай көлікке отырғаны және қай бағытқа кеткені анықталмаған.
Еріктілер қыздың «үйден бас киімсіз шыққанын» атап өтті. Сондай-ақ, оның өзімен бірге телефоны болғаны белгілі. Бірақ әзірге SIM-картасының нөмірі мен құрылғының IMEI-кодын анықтау мүмкін болмаған.
«Барлық жүргізушіге үндеу жасаймыз! Сағат 23:30 бен 00:00 аралығында Алматы – Бішкек тасжолымен, «Бамбарбия Кергуду» ресто-бары мен «Долан» аялдамасының маңынан қала бағытына қарай өткен азаматтардан көлік бейнетіркегіштеріндегі жазбаларды тексеруді сұраймыз. Егер сізде сол уақытқа қатысты бейнежазба болса, жоғалған қызды көрген немесе оны бір жерге жеткізіп салған болсаңыз, +7 705 105 31 31, +7 701 375 92 91нөмірлері арқылы немесе WhatsApp желісімен хабарласыңыз», – делінген бағдарламада.
Іздеу тобы Ясминаны үйінен шыққаннан кейін көрген, бейнебақылау камераларындағы жазбалары бар немесе оның қайда болуы мүмкін екені жөнінде қандай да бір ақпарат білетін азаматтардан шұғыл түрде хабарласуды сұрайды:
- +7 701 375 92 91, +7 705 105 31 31нөмірлеріне қоңырау шалуға немесе WhatsApp арқылы жазуға болады.
- Instagram-дағы парақшаның директіне хабарлама жолдауға болады.
- Немесе 102 нөміріне қоңырау шалу қажет.