Бұл туралы Caravan.kz медиа порталы хабарлайды.
Жоспар бойынша, қазақстандықтар 2028 жылдан бастап қажетті рәсімдер мен тіл тестілеуі іске қосылғаннан кейін Оңтүстік Кореяда ресми түрде жұмысқа орналаса алады.
Бұл қазақстандықтар үшін Оңтүстік Кореядан жұмыс табудың заңды әрі қауіпсіз жаңа мүмкіндігі болмақ. Ең бастысы – азаматтарға күмәнді делдалдарға жүгінудің қажеті болмайды. Үміткерлер бірнеше кезеңнен өтеді. Оның ішінде корей тілінен тест тапсыру, кәсіби дағдыларын тексеру және медициналық тексеруден өту бар.
«EPS жүйесіне қатысу азаматтарға мемлекеттер арасында белгіленген рәсімдер аясында Оңтүстік Кореяда ресми жұмысқа орналасуға мүмкіндік береді. Жаңа тетіктің басты ерекшелігі – жұмысшыларды іріктеу бейресми делдалдар арқылы емес, ресми жүйе арқылы жүргізіледі», – деп хабарлады ҚР Еңбек және халықты әлеуметтік қорғау министрлігі.
Қазақстанды EPS жүйесіне қосу жұмыстары 2023 жылы басталған. 2026 жылдың қаңтарында елге кореялық сарапшылар делегациясы келіп, бағдарламаны іске қосуға Қазақстанның дайындығын бағалады. Мамандар тіл емтихандарын өткізу, кәсіби дағдыларды тексеру және медициналық іріктеуді ұйымдастыру мүмкіндіктерін қарастырды.
Тексеру қорытындысы бойынша кореялық тарап Қазақстанды жүйеге қатысуға дайын деп таныды.
Жұмысқа қабылдау басталғанға дейін бірқатар ұйымдастыру мәселесі шешілуі керек. Атап айтқанда, үкіметаралық меморандумға қол қойылып, Қазақстанда корей тілінен тест өткізетін EPS-TOPIK орталығын ашу жоспарланып отыр.
Еңбек министрлігі қазақстандықтарды қазірдің өзінде Оңтүстік Кореяда «кепілді жұмысқа орналастыруды» немесе іріктеуден өтуді жеделдетуді ұсынып жүрген делдалдарға ақша бермеуге шақырады.
Тіркеудің басталуы, үміткерлерге қойылатын талаптар, тестілеу мерзімі және іріктеудің басқа да кезеңдері туралы ақпарат министрліктің ресми ресурстарында жарияланады.