ҚР Мәдениет және ақпарат министрілігі баспасөз қызметінің мәліметінше, байқау Қазақстан Республикасының Президенті Н.Ә.Назарбаевтың бастамасымен дүниеге келген «Мәдени мұра» Мемлекеттік бағдарламасы аясында және «Астана — түркі әлемінің астанасы» болып жариялануына орай ұйымдастырылып өткізіледі.
Аталмыш шараны өткізудегі басты мақсат — XX ғ. қазақ өнері мен мәдениетінің аса көрнекті өкілі, әнші, жыршы, ақын, сазгер Нартай Бекежанұлының (1890-1954) шығармашылығын насихаттау, жас ұрпақтың Ұлттық дәстүрлі өнерге деген ынта-ықыласын ояту және Нартай Бекежанұлының шығармашылық тұлғасын жаңа қырынан тануға жол ашу.
Байқау бағдарламасының талабына сәйкес әрбір қатысушы Нартай Бекежанұлының 6 әні мен шығармасын орындауы тиіс. Нартай Бекежанұлының замандастары: Тайжан, Шашубай, Майра, Кенен ақынның озық ән үлгілерін сырнай мен домбырада орындау конкурс талаптарына сай тең дәрежеде бағаланады.
Конкурстың соңында жеңімпаздардың қатысуымен Гала-концерт ұйымдастырылады.
