Өнер сапары екі елдің дипломатиялық қарым-қатынастарының орнауына 20 жыл толуына орайластырылды. Белгілі композитор, дирижер, «Дарын» мемлекеттік жастар сыйлығының лауреаты Еркін Нұрымбетов жетекшілік ететін «Орал сазы» ансамблі жиырма жылдан астам уақыт бойы жоғары кәсіби деңгейде халық өнерін насихаттап, халықаралық фестивальдерге де қатысты.
Бұл жолы ансамбль филармония солистері Қанатқали Қожақов, Жаңылсын Хасанова, Еркін Өтегеновтермен бірге Германиядағы Қазақстан елшілігінде, Магдебург қаласында концерттер қойды. Концерт барысында күйлермен, халық әндерімен қатар осы заманғы туындылар да жоғары деңгейде орындалды. Әсіресе, еуропалық көрермендер қазақ ұлт аспаптарының өзіндік үніне тәнті болды.
