— Мынау қайда? Не затқа түсіреді? Осыншама билет неге сатады елдің бәріне?
Әйгілі БОНИ М тобы Атырауда 26 мамыр күні кешкілік концерт беруі тиіс болатын. Бірақ бір сәт жастық шаққа оралып, өткен күнді еске аламыз деп келген көрерменнің көңілі су сепкендей басылды. Сөйтсе, әйгілі топ концерт бермек түгілі, Қазақстанға келмеген де болып шықты.
Дариға Қасиенова, Атырау қаласының тұрғыны:
-Бони М-нің концерті болады деп бізге жариялады. Билет алдым, келсек концерт жоқ. Ал біздің ақшамыз қайда?
Аң-таң болған жұртқа жағдайды түсіндіретін де ешкім табылмады қапелімде. Камера алдында сұхбат беруден бас тартқан ұйымдастырушылар телефон арқылы топтың Қазақстанға бүгін түнде ғана ұшып келіп, еліміздің бес қаласында: Атырау мен Ақтөбеде, Қарағанды мен Астанада және Алматыда концерт беретінін айтты. Ал концерттің аяқ астынан өтпей қалуына билеттің аз сатылуы себеп екен.
Айнагүл Қабиева, концертті ұйымдастырушы:
— 5 мыңнан билет өткен. 20 000 мыңнан бір түйір билет өткен, 18. 000 мыңнан бір түйір билет өткен. Соған байанысты концерт болмады. Біздің ол, шетелдегі рейсті айтпай-ақ қояйын. Шетелдің гонорарын айтпай-ақ қояйын. Ұшақ түгілі қонаүйге ақшамызды жеткізе алмай жатырмыз.
Көрермен, әсіресе орта буын өкілдері аталған топтың концертіне қаладан емес, аудан орталықтарынан да әдейілеп жеткен. Жастық шақтағы өлеңдерді естіп, шабыттанып қайтамыз деген олар ұйымдастырушыларға қатты өкпелі. Ал қарсы тарап болса, концерттің болмайтынын көпшілікке алдын ала хабарладық деп отыр. Олар енді бүгіннен қалдырмай билеттің ақшасын атыраулықтарға түгел таратып бермек.