Кеше оған қатысушылар бір жобамен келген болатын, ал күннің соңына қарай тұтастай команда жиналды. Демалыс күндері жаңа әріптестер тұжырымдамалары мен бизнес-жоспарларын жасап шықпақ, сондай-ақ олар бизнес және технологиялар саласындағы тәжірибелі сарапшылардың көмегімен өз жобаларының өміршеңдігін crush-тестілерде тексеріп көрмек.
Жоба тақырыбы да сан алуан. Мысалға қатысушылардың бірі — Арсен Құдабаев сүт іркітін шығаруды ұсынды. Ол жергілікті ірімшік өндіруші зауытпен де уағдаласып үлгерген.
«Олар күн сайын 700 мың литрге жуық өте пайдалы өнім — сүт іркітін босқа төгуде. Біз бұл өнімді халыққа сатуды ұсындық. Қазір өнімнің дизайнын, сондай-ақ брендін жасаумен айналысудамыз. Оны ілгері жылжыту стратегиясын да ойластырудамыз. Қазіргі кезде бізге жарнамалық науқан ұйымдастыру үшін қаражат керек», — деді конкурсқа қатысушы Арсен Құдабаев.
Конкурс ұйымдастырушыларының атап өтуінше, қазылар алқасы үш жеңімпазды іріктейді. Оларға ақшалай жүлделер тапсырылады: 1 орынға — 300 мың теңге, екінші орын үшін — 200 мың және үшінші орынға — 100 мың теңге.
«Бұл шара әсіресе өңір жастары үшін өте пайдалы. Мұндай бизнес-идеялар конкурстары жастар үшін Алматы мен Астанада өткізіліп жүр. Біз енді өзіміздің бизнес-идеялар конкурсымызды бүкіл республика аумағында өткізбекпіз», — дейді «Атамекен Стартап» қоғамдық қорының директоры Нұрлан Тазабеков.