Бұл туралы бүгін жұмыс берушілер мен түлектердің арасында жүргізілген сауалнаманың қортындыларына арналған брифингте "Кәсіпқор" холдингінің жастар ісі жөніндегі департаментінің директоры Тоғжан Жұмағұлова мәлім етті.
«Маусым-шілде айларында «Ел қанаты» қоғамдық қоры жұмыс берушілердің сұранысына қатысты әлеуметтік сауалнама жүргізді. Оған Қазақстанның 16 өңірінен 200-ден аса жұмыс беруші тартылды. Сауалнама көрсеткеніндей, инженерлер (13,8%) мен дәрігерлер (12,8%) — Қазақстанда сұранысы жоғары мамандықтар. Одан кейін педагогтар (10,1%), бағдарламашылар (7,4%) және құрылысшылар (6,4), маркетологтар (6,2%) келе жатыр», — деді «Ел қанаты» қоғамдық қорының төрағасы Асылбек Жақып.
Сонымен қатар сәуір-маусым айында түлектер арасында мамандықтарды таңдауға қатысты сауалнама өткізілген. 2000 оқушы қатысқан сауалнамада анықталғанындай, олардың арасында техникалық ғылымдар мен инженерлік (20,5%), медицина (19,8%), экономика (13%), заңгерлік (6,1%), мемлекеттік және жергілікті басқару (6,1%) мамандықтарына түсуге ниеттенгендердің қарасы көп.